Moda con clase, estilo e atención personalizada. Despois de 40 anos vestindo a mulleres de todas as idades e tallas coas mellores marcas nacionais e internacionais, a emblemática tenda El Delfín botará o peche o próximo mes de agosto.
María Teresa Tornero Díaz, a súa propietaria, natural de Riaño, en León, chegou a Baiona coas súas tres nenas despois de que o seu marido fose trasladado ao Parador. Tras o nacemento da súa cuarta filla expúxose poñer un negocio, e un día, asomada á xanela da súa casa na Rúa Carabela Pinta, contemplou enfronte e díxose, “que bo sería ese local”, e así empezou todo.
Comezou con perfumería, e logo con artigos de agasallo, pero pronto se deu conta de que o seu era a moda, “onde eu realmente sentinme plenamente satisfeita da miña andaina”, afirma. Roupa de París, Milán, Düsseldorf, Madrid, Barcelona… “Empecei a traballar con marcas importantes, aínda que ao principio tiña moitas casas e boas españolas, logo funme metendo en importación, ata o día de hoxe”. Cada día con cousas novas, sempre buscando o último, estando ao día, “nunca repetín unha peza no escaparate”, comenta.
Hai 15 anos, El Delfín trasladouse a un amplo local situado na Rúa Elduayen, que tras o peche ocupará unha entidade bancaria. “Hai 10 anos que estaban detrás do local, facendo ofertas e contraofertas, e cando as miñas fillas decidiron que non ían vir para aquí, tomei a decisión”.
Para Teresa, o éxito de El Delfín non é soamente seu, senón contar sempre cun persoal “que traballou comigo moitísimo”. Mari Carmen, Julia, Pilar Amoedo, Conchi, Rita… “xente moi cualificada e gozando a moda”.
Poñendo nunha balanza o traballo e a satisfacción, Teresa inclínase cara a “traballar en algo tan interesante e apaixonante como o mundo da moda, e vivilo coma se cada peza fose para min. O negocio hai que vivilo se queres triunfar”. Ao longo de todos estes anos, as súas clientas convertéronse ademais en amigas, “xente que está moi preto de min, mesmo coas que me confeso. Coincidín con xente marabillosa que me axudou moito”.
Teresa, impulsora tamén da Asociación de Comerciantes e Empresarios de Baiona, dedicarase agora aos seus 72 anos ao día a día e seguirá dirixindo a tenda coa que conta no Parador. As súas fillas xemelgas xestionan outro establecemento que leva o seu nome en Ronda Don Bosco, en Vigo, que a partir do 1 de setembro pasará a chamarse El Delfín 2.
Baiona queda sen un dos seus establecementos máis emblemáticos, á altura das mellores tendas de París e que lle deu prestixio. “Pódese xactar de ter unha tenda como moi poucas, non digo en Galicia, en España”.
