Valmiemprega Xove, Obradoiro de Emprego promovido polo Concello de Gondomar en colaboración cos municipios de Baiona e Nigrán, e que conta co cofinanciamento de Xunta de Galicia e do Fondo Social Europeo, vén de rematar o seu programa de actividades en centros escolares do Val Miñor.
Durante os meses de xaneiro, febreiro e marzo desenvolvéronse actividades de sensibilización e promoción do patrimonio cultural e natural e dos recursos turísticos do Val Miñor a través de charlas didácticas e presentacións dirixidas ao alumnado de Primaria e ESO dos distintos centros da comarca.
Durante este período realizáronse un total de 23 accións grupais que beneficiaron a uns 900 escolares dos colexios CEIP Belesar (Baiona), CEIP Cruz-Camos (Nigrán), CEIP Peitieiros (Gondomar), CEIP Souto-Donas (Gondomar), CEIP Fontes-Baíña (Baiona), CEIP Chano Piñeiro (Gondomar), IES Val Miñor (Nigrán) e CEIP Serra-Vincios (Gondomar).
No marco desta colaboración cos centros de ensino, foron organizadas tamén algunhas visitas guiadas para escolares.
O Obradoiro agradece aos centros escolares da comarca a boa acollida que tivo dita campaña.
