Anuncios
Ticker de novas

O alcalde de Baiona fai un balance “moi positivo” da XXII Festa da Arribada

FOTO: CONCELLO DE BAIONA

O alcalde de Baiona, Ángel Rodal, fixo este luns un balance moi positivo da XXII Festa da Arribada, que durante a pasada fin de semana celebrouse na Real Vila. A capacidade para superar as expectativas xeradas, o bo comportamento dos visitantes e a experiencia da organización para solucionar sobre a marcha as adversidades meteorolóxicas foron os aspectos que destacou o rexedor.

“Concello e veciñanza demostraron que poden solucionar calquera inclemencia, porque obviamente se tivésemos unha fin de semana soleada a afluencia sería outra, pero desta forma quedou claro que a Festa da Arribada xa é maior de idade e ten unha capacidade organizativa excelente”, apuntou Rodal.

A Festa de Interese Turístico Internacional recibiu un total de 160.000 persoas durante os tres días de celebracións, segundo os datos da Policía Local, e as lanzadeiras gratuítas que funcionaron dende Porto do Molle trasladaron o sábado e o domingo a preto de 3.000 persoas.

Ángel Rodal tamén valorou a normalidade coa que transcorreu a celebración. “Temos que destacar o comportamento exemplar dos nosos visitantes”, afirmou o alcalde.

Tanto o dispositivo de seguridade, con máis de 200 efectivos, coma o hospital de campaña e o servizo de limpeza, despregáronse na Real Vila para garantir o bo funcionamento da festa. O alcalde sinalou que o uso do vaso oficial de cartón, por primeira vez en lugar de cristal ou barro, facilitou as labores de recollida do lixo.

Tamén o sentido único para os peóns foi “unha boa estrea e estamos seguros de que co paso das edicións suporá una grande medida para mellorar a mobilidade no Casco Vello”. Ademais, os drons da Axencia Galega de Emerxencias contribuíron vixiando o tráfico e a mobilidade dos peóns.

Anuncios