Jake Miller, director de Sport 7, empresa promotora oficial da Copa das Nacións de Trial, por concesión da FIM (Federación Internacional de Motociclismo) visitou esta mañá a vila de Baiona, nun encontro organizado pola Peña Moteros Val Miñor, organizadores da próxima cita intercontinental co mundo do motor.
Recibido polo seu Alcalde, Ángel Rodal, o británico estivo acompañado polo Manager da Copa, o tamén inglés Brian Higgins, nun percorrido polas zonas da competición, que se situarán ao redor do Parador de Turismo, e testificadas polo irlandés David Rodgers, Director de Competición da FIM; o luso Rui Castro, Administrador Principal da FIM; e Jorge Prat, Delegado da Real Federación de Motociclismo Española.
Das cuestións técnicas encargáronse os promotores da gran proba mundial, membros da Peña Moteros Val Miñor, entre os que se atopaban o seu presidente, José Durán; e os técnicos Nano Ferro e José Goce. A concelleira de Turismo de Baiona, Beatriz González, actuou de tradutora e guía de luxo pola vila ante tan distinguida visita, como anfitrións da Copa das Nacións de Trial, que se celebrará os días 23 e 24 de setembro deste ano 2017.
Os representantes da Federación Internacional, así como da empresa promotora, non escatimaron en halagos á contorna paisaxística no que se vai a desenvolver a competición, así como tamén aos trazados das Zonas, que comprenden probas próximas ao mar e á montaña, por baixo da muralla do Parador Nacional de Turismo.
O Monte Real Club de Yates, foi outro dos escenarios visitados polo equipo organizador, do que encomiaron a súa posición e beleza e parte importante destacada no propio evento.
Tan só tres cidades españolas albergaron esta proba intercontinental desde que foi creada en 1984: Seva (Barcelona) ano 2.000; Córdoba, ano 2004; e Tarragona, ano 2015.
A competición desenvólvese por equipos, con tres representantes por equipo e categoría, dos que se esperan uns 150 de 30 nacionalidades diferentes.
