Anuncios
Ticker de novas

Baiona coroa o novo éxito do bádminton galego

FOTO: CONCELLO DE BAIONA

Baiona converteuse este fin de semana en talismán para o bádminton galego ao acoller unha última xornada da liga Nacional na que os equipos da Estrada e As Neves alcanzaron os obxectivos cos que partían a principio de tempada.

E é que o Club Bádminton A Estrada asinou un fin de semana inmaculado para adxudicarse o título de liga e selar o seu ascenso á División de Honra. Os xogadores de Jesús Pereiro non fallaron e con dúas vitorias sobre o Oviedo (6-1) e o Palma (6-1) certificaron xa o sábado a súa gran tempada para distanciarse do Caser Clear Madrid, segundo clasificado con tres puntos menos.

Este domingo, un novo triunfo sobre o Alacante (6-1) pechou a súa participación no Pavillón Municipal de Baiona para coroarse campións da Liga Nacional. Desta forma o equipo que preside Rodrigo Sanjurjo, tamén máximo responsable da Federación Galega de Bádminton, regresa á máxima categoría nacional e o próximo ano pelexará cos mellores clubs de España.

Pola súa banda, o Club Bádminton As Neves, organizador do campionato disputado en Baiona, tamén lograba a permanencia. Tiveron que sufrir os xogadores de Pablo Méndez ata o último suspiro, posto que o sábado caeron derrotados ante o poderoso Caser Clear (5-2) e fronte ao Hoyo Manzanares (3-4).

Todo quedaba pendente do que ocorrese a mañá deste domingo e os das Neves non fallaron. O seu triunfo sobre Torrejón Paracuellos (3-4) permitiulles lograr os puntos necesarios para continuar un ano máis na Liga Nacional.

O alcalde de Baiona, Ángel Rodal; o presidente da Federación Española de Bádminton, David Cabello; o presidente da Federación Galega, Rodrigo Sanjurjo; o responsable de promoción da Federación Galega, Pablo Méndez, e a concelleira de Deportes de Baiona, María Jesús Martíns, asistiron á entrega de premios que pechou un gran fin de semana de bádminton en Baiona.

Os responsables da organización agradeceron o apoio do Concello de Baiona e destacaron a excelente resposta das instalacións do Pavillón Municipal durante un fin de semana marcado polas inclemencias meteorolóxicas.

Anuncios

Deja un comentario

Tu dirección de correo electrónico no será publicada.