30 veleiros participarán a próxima semana na IV Ruta Rías Baixas, que organizan o Monte Real Club de Yates, o Real Club Náutico de Portosín e a Asociación Camiño de Santiago Ría Muros – Noia co patrocinio de Sabadell Urquijo. É a cuarta edición dunha travesía lúdica que busca divulgar a cultura mariñeira, promover o turismo náutico, impulsar o deporte da vela e dar a coñecer o Camiño de Santiago por mar e as potencialidades dos diferentes portos das Rías Baixas.
A peregrinación partirá o 1 de xullo desde Baiona, pasará polas illas Cíes, Aldán, Combarro, a illa de Ons, Portonovo, o illote Areoso, a Pobra do Caramiñal, Corrubedo e Fisterra, entre outros puntos, antes de acabar o seu percorrido por mar en Portosín. Serán cinco días de navegación, percorrendo a vela unhas 25 millas de media, que finalizarán cun trazado por terra ata Santiago de Compostela.
Ao superar as 90 millas náuticas, os participantes que o desexen terán a posibilidade de conseguir a Compostela, debendo selar en cada punto do trazado a súa credencial de peregrinos. Ademais, nas distintas recaladas, os tripulantes poderán gozar de diferentes propostas organizadas para o seu desfrute e confraternización, como ceas ou concertos.
Durante todo o percorrido, a frota irá acompañada por varias embarcacións do Monte Real Club de Yates. Un equipo de organización e seguridade ao que tamén se sumará unha furgoneta que irá seguindo o seu itinerario por terra.
A IV Ruta Rías Baixas foi presentada oficialmente este mércores no Monte Real Club de Yates, nun acto no que estivo presente a directora de Centro de Banca Privada Galicia Sur de Banco Sabadell, que patrocina a iniciativa. Na súa intervención, Patricia de Oya, explicou como o roteiro se aliña cos valores que representan á entidade e que o patrocinio responde o seu compromiso, non só co deporte -dixo- senón tamén co crecemento económico e social de Galicia.
Xunto a ela tamén interviñeron o vicepresidente e comodoro do MRCYB, Alejandro Retolaza e Ignacio Sánchez Otaegui; o directivo do Real Club Náutico de Portosín, José Antonio García; e o alcalde de Baiona, Jesús Vázquez Almuiña. Tamén asistiron os alcaldes de Noia, Muros, Outes, Porto do Son e A Pobra do Caramiñal.
