O vindeiro xoves 27, a sala de xuntas do Hospital Vithas Vigo acollerá un obradoiro de fotoprotección infantil impartido polas pediatras Cristina Granja e Patricia Oliván. Esta iniciativa forma parte do programa Vithas Aula Saúde de formación en saúde á cidadanía.
A fotoprotección no verán é, sen dúbida, unha medida de prevención de primeira orde. Pero no caso dos nenos hai que ter en conta que o coidado diario e mantemento da pel dos máis pequenos é fundamental e merece un coidado especial, dado que, nesta etapa da vida, a pel é inmatura, máis fina e delicada, e resulta fundamental protexela do sol e outros axentes externos para asegurar unha correcta maduración e desenvolvemento.
As dúas pediatras do Hospital Vithas Vigo responderán a dúbidas comúns dos pais sobre o tipo de protección solar a utilizar segundo en que idades; cada canto tempo e como se deben de aplicar, e as distintas texturas destes produtos para que resulten máis agradables ao tacto dos nenos.
Para asistir a este obradoiro de fotoprotección só é necesario reservar praza enviando un correo electrónico a aulasalud.galicia@vithas.es, dado que a inscrición é gratuíta ata completar o aforo.
Nesta ocasión, para facilitar a conciliación familiar, Vithas e Rilastil poñerán ao dispor dos asistentes un animador sociocultural para atender aos fillos dos que queiran asistir a este obradoiro cunha duración aproximada dunha hora.
Este Aula Saúde forma parte da iniciativa de Vithas de formar e informar á sociedade sobre aspectos relacionados co coidado da saúde como parte do seu compromiso coa sustentabilidade empresarial.
