Este luns faleceu aos 54 anos de idade Mauricio Enrique Vilar Pereira, máis coñecido como “Mauri”. Fillo de Antonio de Mauricio, lembrado correspondente de Faro de Vigo, Atlántico Diario e El Correo Gallego.
No 2019 concorreu ás eleccións municipais como número 6 da candidatura do Partido Popular liderada por Ángel Rodal, formando parte da Corporación como concelleiro da oposición ata o pasado ano 2023, durante o goberno tripartito encabezado por Carlos Gómez. “Desde o Partido Popular de Baiona trasladamos o noso máis sentido pésame a todos os seus familiares e amigos”, sinalaron os populares.
Tamén foi presidente da Asociación Pro-Hermanamientos Cristóbal García Sarmiento, creada en 2015 co fin de dar apoio e continuidade á relación cos Pobos Irmáns de Santa Fe (Granada), Palos de la Frontera (Huelva), Vila do Bispo (Portugal), Pornic (Francia), co obxectivo de estreitar lazos cos pobos irmandados, divulgar a historia de Baiona, realizar intercambios e eventos que promocionen este municipio.
Os seus restos mortais serán velados na Sala Nº 4 do Tanatorio do Miñor ata as 19:00 horas deste martes. A continuación, será incinerado na intimidade familiar. O funeral celebrarase o mércores 19 de xuño ás 16:30 horas na Igrexa Parroquial de Baiona.
