Preto de 40 veleiros con só dous tripulantes a bordo dispútanse este sábado o Campionato Galego de A Dous, que o Monte Real Club de Yates organiza un ano máis -e xa van trece-, por delegación da Real Federación Galega de Vela.
Ás once da mañá ecoará, na baía de Baiona, o bocinazo de saída dunha proba que levará aos participantes a navegar parte das Rías Baixas ata a illa de Ons para volver e cruzar a liña de chegada nunha zona próxima ao momento de partida. Esa é, en principio a previsión de percorrido a espera do que deparen as condicións meteorolóxicas que, a priori, preséntanse complicadas polo escaso vento, sobre todo nas primeiras horas de competición.
Entre os participantes, os J80 pertencen, maioritariamente á frota do Monte Real Club de Yates, aínda que tamén haberá barcos doutros clubs como o de Portonovo, polo que competirán Jaime Barreiro e Javier Porto.
Na clase ORC hai moita máis variedade de orixes. Desde o Real Club Náutico da Coruña chegará a parella formada por Jesús e Victoria Pintos; polo Club Marítimo de Canido correrán Antonio Tena e Guido Cerquira; José Antonio Portas e Amanda Silva representarán ao Club Náutico de Vilagarcía; Vicente Cid e Javier Fernández-Ahuja farán o propio polo Real Club Náutico de Vigo; e Juan José Martínez e Joaquín Carneiro navegarán baixo a grímpola do Club Náutico Castrelo de Miño. Do Club Náutico Cabanas aspiran ao título as parellas formadas por Antonio Arda e Antonio Ríos, e Miguel Ángel Fernández e Carolina Martínez; e polo club Moaña Mar veremos competindo a Roberto Telle e Ana de la Torre.
Son só algúns dos participantes entre os que tamén estarán dúas das parellas que ostentan, na actualidade, o título de Campións Galegos de A Dous: Brenda Maure e Jacobo Vecino, do Real Club Náutico de Vigo; e Andrés e Víctor Gómez, do Monte Real Club de Yates de Baiona. É precisamente o club organizador o que contará cun maior número de barcos competindo, como o Orion de Javier Pérez e Esteban Gañete; o Asante Sanda de Juan Carlos Trabazos e Joaquín Dasilva; ou o Wyte Dolphin de Ramón e Martín Barros, entre outros moitos.
Polo Monte Real correrá tamén o único equipo feminino que aspira ao título, o formado polas novas regatistas Carolina Terrón e Hilda Martín, dúas habituais das ligas de J80 que navegarán a bordo do Pazo de Cea.
O Campionato Galego de A Dous deste 2024 finalizará ás oito da tarde no Monte Real Club de Yates coa entrega de premios aos gañadores, un acto ao que se prevé que asista, entre outras autoridades, o fillo do histórico presidente do Monte Real, Don Rafael Olmedo Limeses, ao que se lle dedica a competición.
Todos os que queiran seguir en directo a competición, coñecendo en cada momento a localización e velocidade dos veleiros participantes, poderán facelo a través da web do Monte Real Club de Yates (www.mrcyb.es) grazas a un sistema de seguimento que levarán a bordo as tripulacións.
