Chegou a alta montaña nas dúas roldas por etapas que está a disputar o Vigo-Rías Baixas e a estrutura presidida por José Luis Chamorro demostrou este venres que é un equipo, sobre todo, de escaladores. O costarriqueño Dylan Jiménez asinou a segunda posición na etapa raíña da Volta a Portugal do Futuro, onde o seu compañeiro Owen Lightfoot non puido manter a camisola de líder, e na Volta a Navarra o utrerano David González logrou un top-10 de moito nivel.
A xornada máis curta, pero ao mesmo tempo a máis dura, da 31ª Volta a Portugal do Futuro arrancou co británico Lightfoot defendendo o xersei amarelo tras a súa vitoria o día anterior, na apertura da volta, en Leiria. Os 120 quilómetros entre Murtosa e São Pedro do Sul terminaban no alto de São Macário, un porto de 1ª categoría. Ao comezo desa ascensión de 9 km presentouse cun minuto de vantaxe sobre o pelotón un grupo de catorce ciclistas. Entre eles non se atopaba o líder, pero si o seu compañeiro Jiménez.
O costarriqueño foi o segundo ciclista máis forte da fuga nas ramplas finais. Cruzou a liña de meta a 1 minuto e 38 segundos do gañador, o italiano Luca Bagnara (Polti-Kometa), e 23” por diante do terceiro clasificado, o portugués Alexandre Montez (Credibom-A Alumínios). Esta mesma orde ocupan os tres primeiros na xeral a falta de dúas etapas para a conclusión da rolda lusa
A montaña continuará este sábado nesta volta para corredores sub-23. No 143 km entre Góis e Pombas contabilízanse cinco subidas puntuables.
Volta a Navarra
Outra escapada tamén triunfou na segunda xornada da 61ª Volta a Navarra. Sen presenza nunha fuga numerosa que se formou ao pouco de empezar a pedalear en Urdax, o Vigo-Rías Baixas xogou desde o pelotón a baza do seu xefe de filas e David González ratificou que é un dos mellores escaladores do panorama estatal. Nunha etapa de 123 km con cinco portos, tres deles de 1ª categoría, o utrerano atopouse na súa salsa e alcanzou a meta, situada na cima de Bagordi, en oitava posición a 1’07” do vencedor e novo líder Alex Díaz (Caja Rural), un dos catro sobreviventes do grupo que rodou case todo o día na cabeza.
Oitavo tamén na xeral, González terá de novo este sábado unha oportunidade para brillar. A penúltima etapa, a máis esixente desta proba, ofrece 177 km e cinco portos no itinerario entre Olloki e Zubiri. Destaca o alto de Artesiaga, de 1ª categoría e quince quilómetros de lonxitude, que se coroa a 20 km do final.
