O hospital Ribera Povisa renovou o seu equipamento na área de radiodiagnóstico coa instalación dun novo ortopantomógrafo que permite unha radiografía panorámica dental con imaxes de alta calidade e unha menor radiación para o paciente. A notable mellora da definición das imaxes obtidas incrementa a precisión do diagnóstico.
A ortopantomografía, coñecida como radiografía panorámica dental, é unha técnica que se serve de raios X para confeccionar unha impresión que une varias radiografías bidimensionais superpostas polo que se logra un resultado tridimensional das estruturas faciais nunha soa imaxe.
O novo ortopantomógrafo Vatech Green 16/18 de Samsung, instalado no hospital Ribera Povisa incorpora o sistema 4-en-1 máis avanzado de imaxes de raios X dixitais proporciona imaxes de alta calidade con ata un 70% menos de radiación para os pacientes que outros equipos similares.
“Todo o relativo ás enfermidades dentais e ás patoloxías da cavidade oral e a mandíbula ten hoxe en día moita máis importancia non só desde o punto de vista médico senón tamén social. E resulta importante ter unha tecnoloxía que permita o diagnóstico máis preciso e mesmo a simulación virtual da colocación de implantes. Canta máis información preoperatoria exista mellor resultado funcional e estético van ter os pacientes”, sinala o xefe do servizo de Radiodiagnóstico, o doutor Francisco Tardáguila.
As imaxes do novo ortopantomógrafo ofrecen ao especialista unha información moito máis detallada das estruturas dentais e a anatomía oral, facilitando o diagnóstico de complicacións orais e calquera afectación en dentes, maxilares e mandíbula.
“Este novo ortopantomógrafo ofrécenos unha mellor resolución espacial. A forma de ver aos pacientes é moito mellor e ademais é moito máis cómodo para eles. Permítenos, por outra banda, unha planificación precirúrxica en tres dimensións que se lle pode ensinar ao paciente de maneira que vai ver como quedará despois de operar”, puntualiza Eloísa Santos, neurorradióloga do hospital Ribera Povisa.
A ortopantomografía é un estudo moi cómodo para o paciente, que durante a proba colócase de pé fronte ao aparello, mordendo unha pequena peza que lle permite separar as dúas arcadas da boca e rexistrar a posición e tipo de mordida. Despois da súa colocación, o aparello vira ao redor da cabeza do paciente, e en cuestión de segundos os resultados quedan rexistrados. É un procedemento rápido e indoloro.
