A Xunta de Galicia convoca a través da Academia Galega de Seguridade Pública (AGASP) o “Curso de Formación Específica de Socorrismo en Instalacións e Espazos Acuáticos en Galicia”. O curso se levará a cabo en Baiona grazas ao interese e compromiso mostrado polo Concello. Desde a Concellería de Medio Ambiente e a Concellería de Xuventude, traballouse estreitamente coa Xunta e a Federación de Salvamento e Socorrismo de Galicia para organizar as aulas e o resto de instalacións necesarias para o desenvolvemento do curso. As clases teóricas impartiranse no Multiusos Ángel Bedriñana, mentres que algunhas das prácticas, realizaranse na Piscina Mancomunada do Val Miñor e nas praias do municipio.
Este curso formativo, totalmente gratuíto, ten como obxectivo proporcionar aos mozos unha oportunidade de formación e desenvolvemento profesional no ámbito do socorrismo, co fin de abrir portas a futuras oportunidades laborais. O prazo de inscrición estará aberto desde o 18 de abril ata o 26 de abril de 2024. O curso desenvolverase desde o 3 de maio ata o 15 de xuño, cunha duración total de 120 horas das cales 70 horas son teóricas, 30 horas prácticas en praias e 20 horas prácticas en piscina. A proba específica de acceso se levará a cabo o 3 de maio ás 16:00 horas.
As prazas son limitadas e están destinadas a persoas maiores de 18 anos que posúan o título de Graduado/a en Educación Secundaria Obrigatoria (ESO). Os interesados deberán enviar por correo electrónico o seu título de graduado en ESO a formacion.emerxencias.agasp@xunta.gal durante o período de solicitudes. A selección dos participantes realizarase seguindo os seguintes criterios: orde de entrada da solicitude de inscrición; reserva do 30% das prazas para voluntarios/as activos/as nunha agrupación ou asociación de voluntarios de Protección Civil que superasen o curso básico de Protección Civil; reserva do 50% das prazas para solicitantes mulleres que cumpran cos requisitos establecidos.
No caso de que non se complete a reserva de prazas segundo os criterios 2 e 3, completarase co resto de solicitudes dispoñibles. O alumnado admitido deberá contar co seguinte material: gorro e lentes de natación, bañador, chanclas, aletas e útiles persoais de aseo. As inscricións poden realizarse na seguinte ligazón.
