A madrugada deste domingo día 31 de marzo comeza o horario de verán, que se prolongará ata o 27 de outubro. Ás 02:00 da madrugada pasarán a ser as 03:00, polo que se durmirá unha hora menos do que viña gozando desde o cambio de hora de inverno.
Os países da Unión Europea cambian a hora dúas veces ao ano co principal obxectivo de aforrar enerxía e aproveitar a luz solar. O primeiro cambio aplicouse en Alemaña e Austria o 30 de abril de 1916, pero en España non chegou ata o ano 1918, cando se publicou un decreto para aforrar carbón.
Con todo, un informe de 2019 da Comisión de Industria, Investigación e Enerxía do Parlamento Europeo afirmou que eses aforros son marxinais, xa que pode habelos en iluminación, pero non son tan obvios en calefacción, cuxo consumo podería mesmo aumentar no inverno.
De feito, o Parlamento Europeo acordou poñer fin a esta práctica na UE a partir de 2021, permitindo a cada país elixir se manter o horario de verán ou o de inverno, pero a medida non chegou a termo por falta de acordo. En España tamén se decidiu pospoñer esta decisión por falta de consenso.
