Enmarcado nas actividades divulgativas e formativas da Escola da Saúde Talaso Atlántico, uns 30 alumnos de terceiro e cuarto curso do Grao de Turismo da Universidade da Coruña visitaron o pasado venres, 22 de marzo, as instalacións do centro de talasoterapia e coñeceron de primeira man a misión e visión deste foro sanitario.
Os futuros profesionais do turismo participaron de actividades teóricas e prácticas guiadas polo director médico de Talaso Atlántico, Salvador Ramos. Ademais, estiveron acompañados polo Profesor da UDC, Mario Crecente, Arquitecto e Experto Internacional no ámbito do Turismo Termal e presidente do comité científico da Asociación Europea de Cidades Termais Históricas (EHTTA).
