O Concello de Nigrán estreou este mes no Auditorio Municipal un programa piloto a nivel nacional para introducir a “Arte Terapia” no tratamento das persoas con diversos problemas de saúde mental (desde ansiedade a crise post-traumática, dó, depresión, crise vital…). Deste xeito, o Concello toma nota efectiva da recomendación da Organización Mundial da Saúde (OMS) en novembro de 2019 de que os gobernos e administracións introduzan as artes no sistema sanitario como complemento ao tratamento farmacolóxico e para a prevención de doenzas. En concreto, esta novidosa iniciativa que se desenvolverá en 6 sesións matinais de aquí a maio, nace de xeito totalmente altruísta da man de Julio Francisco Fóthy, médico de familia do Centro de Saúde Val Miñor, e a arteterapeuta Lucía González Vicente da Fundación Eomaia, e o obxectivo é abrir o programa no mes de setembro a todas as cotas do ambulatorio.
“É un orgullo ofrecer desde o Concello de Nigrán este programa que, sabemos, non substitúe á atención médica, pero axuda na contención emocional da persoa que está agardando por unha consulta e, ao mesmo tempo, estimula a súa autonomía e autoxestión, así que estamos moi agradecidos a Julio Francisco e Lucía González de terse dirixido a nós con esta proposta”, explica o alcalde, Juan González. “Non se trata en ningún caso dun obradoiro de pintura nin un curso para aprender técnicas, sendo o propio médico de cabeceira quen prescribe a intervención, como se fose unha receita”, subliña Roberto Garrido, edil de Cultura coordinador desta iniciativa.
“Confeccionamos grupos onde teñamos a seguridade que cada un poida expresarse e coñecerse a si mesmo en prol do desenvolvemento persoal; ten que haber un equilibrio de caracteres para que non se solapen uns a outros”, explica Fóthy, quen estará en cada sesión “na retagarda” para poder apoiar a Lucía González, arteterapeura cuxos anos de experiencia avalan os bos resultados obtidos. “A arte é un medio de expresión que acompaña, que che descobre a ti mesma, e o proceso creador é imprevisible como a vida mesma, por iso é moi importante para a miña que un profesional médico como Julio recoñeza os seus beneficios e prescríbao”, explica Lucía, quen traballa fundamentalmente coa acuarela para que as persoas “flúan” co pincel deixándose levar e sen pensar demasiado. “Isto non é un obradoiro libre, son sesións previamente moi preparadas, dirixidas en todo momento, cunhas normas claras e que culminan cunha ‘recollida’, isto é un encontro compartido nesta contorna segura para que a xente marche con asuntos pechados e non con problemas abertos”, matiza.
“Este é un programa piloto. Sabemos que os resultados van ser bos porque coñecemos a experiencia respecto diso. Así que a partir de setembro traballaremos para lograr fondos que o cubran e que os pacientes sexan derivados de maneira equilibrada das 9 cotas do CS Val Miñor Xunqueira, coa posibilidade de ampliar a oferta aos CS Gondomar, CS Panxón, CS Baiona. Queda moito traballo”, recoñece Julio.
