O Partido Popular de Nigrán, a través da súa voceira municipal María José Pino, denuncia a “actitude inconsecuente” mostrada polo alcalde Juan González con respecto ás políticas ambientais e de mobilidade sostible. “Desde a súa chegada á alcaldía, o actual rexedor socialista tentou proxectar unha imaxe ligada á sustentabilidade e a defensa ambiental. Froito diso foi a continua promoción do slogan “Nigrán, equilibrio natural”, á cal asignáronse numerosas partidas orzamentarias para a publicidade da mesma en distintos medios de comunicación”.
Ao longo da última semana veuse publicando a noticia da asistencia do alcalde Juan González á clausura do proxecto “Acceso Cidades”, celebrada en Río de Janeiro. “Nela, o rexedor protagonizou un episodio de autoeloxio vergoñoso, poñendo en valor actuacións como a actual liña de Nigranbús, a implantación de leiraparkings nos centros urbanos ou as electrolineiras gratuítas”. Con todo, Pino recalca que a realidade moitas veces choca frontalmente coa propaganda, polo que desde o Grupo Municipal Popular quérese poñer de manifesto a realidade actual:
– Nigranbús: A actual liña, á parte de suscitar numerosas queixas por parte dos veciños e veciñas do municipio polo seu itinerario e a escaseza de paradas, mostrouse como un servizo deficitario desde o punto de vista económico e intranscendente para a mobilidade pola súa paupérrima ocupación. Desde o grupo municipal popular veuse demandando que a partida orzamentaria asignada a este servizo estaría mellor empregada no establecemento dun “Bono Taxi” para os veciños e veciñas que o precisen.
– Leiraparkings: A apertura de aparcadoiros gratuítos nos principais centros urbanos do Concello contou sempre co apoio do Partido Popular de Nigrán. Con todo, a xestión por parte do goberno municipal foi nefasta: peche do leiraparking existente en Nigrán entre denuncias dos propietarios para abrir posteriormente un de menor capacidade; peche do aparcadoiro existente en Praia América sen aviso de ningún tipo e sen ofrecer alternativa; deixamento absoluto ante a falta de aparcamento en Panxón; xestión sumamente cuestionable do aparcadoiro público de Ramallosa, que se atopa con dúas plantas pechadas e problemas de accesibilidade, etc.
– Electrolineiras “gratuítas”: Deixando de lado o erróneo discurso de declarar a gratuidade dun servizo cando este está sufragado cos impostos de todos, o certo é que a supervisión dos puntos de carga existentes é nula. Debido a isto, é común atoparnos con coches estacionados durante innumerables horas sen ser retirados, acceso ilimitado para calquera persoa, sexa ou non veciño do municipio, obviando outros aspectos como o nivel de renda do mesmo.
Debido a todo o exposto, desde o Partido Popular de Nigrán esíxeselle ao goberno municipal que empece a xestionar dunha maneira máis racional os fondos públicos, e que as accións levadas a cabo en políticas ambientais e de mobilidade sostible non queden en mera propaganda e constitúan unha cortina de fume para disimular a súa “deficiente xestión”.
