O Concello de Baiona gozará este sábado da celebración adiantada do Entroido. Dezaseis comparsas participarán no desfile organizado pola Concellería de Festexos, que terá saída ás 17:00 horas desde a Avenida Urbana de Sabarís, e percorrerán as rúas Santa Marta, Monterreal e Elduayen para terminar no Paseo Ribeira. Tras o desfile, terá lugar o tradicional enterro da sardiña.
O Concello de Baiona repartirá un total de 6.500 euros en premios. Por unha banda, establécense primeiro, segundo, terceiro, cuarto e quinto premio, dotados de 900, 650, 500, 400 e 300 euros, respectivamente; e por outra, co importe restante (3750 euros) repartiranse entre as demais comparsas participantes, distribuíndose de acordo con o número de compoñentes de cada unha delas.
Os criterios de valoración do xurado centraranse no vestiario, máscaras e maquillaxes axeitados á temática que representen; orixinalidade, enxeño, caracterización e instrumentacións; actitude no desfile acorde con motivo na exhibición; calidade e creatividade na exhibición e número de compoñentes da comparsa. Deste xeito, o Concello de Baiona será un dos primeiros en levar a cabo esta celebración.
Corte de tráfico da PO-552
O Concello de Baiona, a través da Xefatura da Policía Local, realizará este sábado, 3 de febreiro, en xornada de tarde, un corte de tráfico progresivo e desvíos con motivo do Desfile de Comparsas de Entroido.
O primeiro dos cortes producirase desde as 15:00 horas no carril dirección Vigo da Avenida Urbana de Sabarís ata as 16:45, cando o tráfico quedará totalmente cortado a partir das 17:00 horas desde a rotonda da autoestrada en Sabarís (PO-552 Km. 14.500) ata a rotonda do Villa Rosa (PO-552 Km 17) ata o final do desfile, que se estima sobre as 20:30 horas. O tráfico será desviado por vías alternativas e pola circunvalación AG-57.
