O barrio do Portelo, na parroquia gondomareña de Mañufe, celebra a próxima fin de semana as festas na honra de San Sebastián. O venres 19 de xaneiro a partir das 21:00 horas comezará a gran verbena a cargo dos tríos 3.com e Tic Tac. O sábado día 20 a programación arrancará ás 8:00 da mañá cunha tirada de bombas de palenque. Ás 10:00 comezará un percorrido pola parroquia para a colleita de produtos para a poxa na honra de San Sebastián acompañados pola charanga Noroeste (Saída desde Cafetería Expo, Portavedra, San Andrés, Nande, A Costa, San Sebastián -chegada aproximada ás 12:00 do mediodía-, 15:00 horas San Sebastián, Lobadas, Galisteo, Lameiro, Fontán, A Ponte, Campo das Vestas e Torreiro de San Sebastián ás 17:00 horas aproximadamente). Ás 12:30 do mediodía celebrarase a Misa na honra de San Sebastián seguida de procesión acompañada pola mesma charanga. Ás 17:00 horas terán lugar as poxas na honra de San Sebastián e pola noite, o trío Conecta-3 e o grupo Alaska amenizarán a verbena fin de festa. O Torreiro está cuberto cunha carpa.
Festas de San Sebastián do Portelo en Mañufe
