Asime e a Asociación de Empresarios da Pasaxe analizaron na mañá deste xoves a situación do proceso de regularización do Polígono Industrial, que conta con todos os permisos necesarios e foi xa aprobada polas autoridades competentes. Con todo, está a sufrir atrasos no inicio das obras debido aos sobrecustos reclamados pola empresa construtora por mor da elevada inflación rexistrada nos últimos anos.
Enrique Mallón, Secretario Xeral de Asime, lembra que “o Polígono Industrial da Pasaxe é de vital importancia, non só para Vigo e Gondomar, senón para todo o sur de Galicia e para o conxunto do sector industrial galego. Estamos a falar de máis de 64 empresas que xeran máis de 3.000 postos de traballo, un 80% deles netamente industriais. Levan 8 anos loitando para conseguir a urbanización e legalización do polígono, que é absolutamente crucial para manter o emprego e a competitividade na zona”.
Mallón destacou o firme apoio e compromiso de todas as administracións para levar a cabo este proxecto, pero explica que “moitas das empresas afectadas, a pesar de estar moi consolidadas a nivel internacional, non están exentas dos golpes económicos sufridos pola alza xeneralizada de prezos que vén vivindo desde o estalido da guerra de Rusia”. É por iso que, desde ambas as dúas asociacións, piden a todas as administracións públicas con competencia na materia que “reforcen un pouco máis o seu compromiso para que estes sobrecustos que implican agora as obras non sexan asumidos en exclusiva polas empresas, xa que non poden facerlle fronte debido a que elas tamén están afectadas pola conxuntura económica”.
Reclaman así que non quede paralizado este proxecto de urbanización do polígono, que é tan importante para o desenvolvemento económico de Galicia. Nese sentido, lembran que, cando esta legalización se leve a cabo e as empresas poidan investir en melloras e ampliacións das súas instalacións, estas terán un retorno inmediato na sociedade e as administracións, xa que xerarán máis recadación de impostos.
Patricio Fernández, CEO de Industrias Ferri e Vicepresidente de Asime e da Asociación de empresarios da Pasaxe, explicou a situación á que se enfrontan as empresas afectadas. “No noso caso, necesitamos facer investimentos e crecer para adaptarnos a contratos e ao mercado. Nos próximos cinco anos temos que pasar de 100 a 200 traballadores. Imos duplicar a nosa capacidade de produción e os nosos empregos, e por tanto as nosas instalacións deben crecer na mesma medida. Se non se legaliza o polígono, non podemos acometer estes investimentos”.
No outro lado da balanza, explica Patricio Fernández, están moitas empresas que correron menos sorte despois das continuadas crises económicas e inflación imperante: “Hai outras empresas do polígono que, por desgraza, teñen agora unha situación económica delicada e non poden facer fronte ao custo das obras de urbanización cos incrementos actuais”.
“Desde o inicio, os empresarios e empresarias do polígono propuxemos pagar nós mesmos os investimentos necesarios para a súa urbanización e legalización. Con todo, nun inicio hai 8 anos estes custos eran de ao redor de 3 millóns de euros, mentres que agora ascenden a case 7 millóns. Por iso pedimos ás administracións que se sigan envorcando neste proxecto como o levan facendo desde hai tempo, para que lle deamos entre todos un último empuxón para poder facer fronte a nivel económico aos sobrecustos que reclama a empresa construtora como resultado da inflación imperante no último ano”.
Javier Díaz, presidente da Asociación Empresarial A Pasaxe: “Estamos preocupados polo inicio da obra, temos moita présa en que esta non se demore máis, porque hai moitas empresas que a necesitan para seguir crecendo e outras que, por desgraza, están a atravesar malos momentos como para facer fronte aos investimentos cos sobrecustos actuais que implican”.
Respecto ás consecuencias de non realizarse as obras, Díaz indica que isto “abocaría ás empresas a pechar ou a deslocalizarse a outros polígonos ou rexións, porque aquí non son capaces de seguir crecendo e á vez afrontar custos de urbanización tan relevantes”. Ademais, se o polígono non está legalizado, “estas empresas non poden ter certificados e licenzas que lles habilitan para conseguir fondos públicos, polo que están a perder oportunidades e competitividade”.
