Correos xa ofrece aos peregrinos e peregrinas que vaian facer o Camiño de Santiago o próximo ano a posibilidade de contratar o seu servizo de transporte de mochilas etapa a etapa no Camiño de Santiago. O Paq Mochila, que se contrata en http://www.paqmochila.com a través dun sinxelo formulario dispoñible en 9 idiomas, permite ao peregrino camiñar sen cargar coa súa equipaxe ao longo do seu Camiño. O carteiro pasará a partir das 8:00 a recoller a equipaxe no aloxamento indicado polos peregrinos na súa reserva e deixarao no seguinte antes das 14:30 horas.
Correos realiza durante todo o ano o transporte de equipaxes no Camiño desde Sarria e Tui a Santiago e a partir de Semana Santa ata o 31 de outubro está dispoñible no Camiño Francés desde Roncesvalles e Somport, o Camiño Portugués desde Tui e A Guarda -incluída a Variante Espiritual-, o Camiño do Norte desde Irún, o Camiño Primitivo desde Oviedo, o Camiño Inglés desde Ferrol, o Camiño de Inverno desde Ponferrada, o Camiño Mozárabe-Vía da Prata desde Ourense e o Camiño a Fisterra e Muxía.
Más servizos de Correos no Camiño de Santiago
Ademais do Paq Mochila, Correos seguirá ofrecendo ao peregrino en 2024 toda unha serie de servizos que poden resultar moi útiles ao longo do seu Camiño de Santiago. Entre eles destacan o Paq Peregrino, para enviar maletas e paquetes a Santiago, de volta a casa ou a calquera punto do Camiño; o Paq Bicicleta, para enviar as bicicletas tanto antes como despois do Camiño; e a consigna en Santiago, situada na oficina de Correos da Rúa do Franco, a dous minutos a pé da Catedral.
A web http://www.elcaminoconcorreos.com conta ademais co primeiro buscador específico de aloxamentos para peregrinos e peregrinas, con información de máis de 4.000 albergues, hostais, pensións e hoteis presentes nos Roteiros Xacobeos máis populares: http://www.elcaminoconcorreos.com/es/alojamientos. Na web tamén se pode atopar información pormenorizada de cada etapa dos distintos Roteiros Xacobeos, con consellos dos carteiros das distintas zonas.
