A portavoz municipal do PP de Nigrán, María José Pino, acusou o alcalde, Juan González, de “gobernar contra os veciños” neste inicio de mandato, do que mañá se cumpren os catro primeiros meses, e lamentou as numerosas dificultades e problemas nos temas de maior calado, como o escurantismo do novo Plan Xeral de Ordenación Municipal (PXOM), a opacidade e o gasto disparado do prego do servizo de recollida de lixo e limpeza e a forte subida do Imposto de Bens Inmobles (IBI).
“Non só é que non haxa nin unha medida a favor dos veciños e de mellorar a súa calidade de vida, é que se cumpre o terzo inicial deste primeiro ano de lexislatura e todas as medidas adoptadas polo executivo de Juan González parecen deseñadas contra os cidadáns de Nigrán. Estes catro meses son, sen dúbida, os máis negros desde que é rexedor e a verdade é que xa parecía difícil superar a súa errática xestión anterior”, manifestou a concelleira popular.
Pino, que fixo un balance deste inicio de mandato na sede do PP de Nigrán acompañada dos demais concelleiros do grupo municipal, clamou contra a ocultación do novo plan urbanístico ante os cambios substanciais que recolle este documento, que prexudican aos veciños e que poderían sustentar unha posterior e gravosa anulación.
Por iso, a portavoz do PP de Nigrán volve reiterar a súa petición de que se estableza un novo período de exposición pública do documento previo á aprobación inicial, xa que “aínda que supoña un pequeno atraso na aprobación definitiva -en Baiona fíxose e só supuxo un ano máis- outorgará unha maior seguridade xurídica, evitando que unha xudicialización posterior tombe o novo plan, que é imprescindible para o futuro do Concello, e haxa que volver ao PXOM de 2013, que é algo que non nos podemos permitir”.
Ademais, e na mesma liña, María José Pino tamén denunciou a “nefasta xestión” do goberno socialista no novo prego do servizo de recollida de residuos, limpeza viaria e de praias, “xa que leva prorrogado case dous anos e medio cun dos habituais contratos verbais do alcalde, a pesar de que o interventor advertiu de que son legalmente improcedentes, e que motivou o empeoramento do servizo con efectos perniciosos para os traballadores”.
Respecto diso, tamén incidiu en que o novo prego, do que tamén lamenta a súa opacidade, incorre nun incremento desmesurado da súa contía, xa que se pasa de abonar 130.000 euros mensuais a 274.643, o que supón un aumento do 110% “que moito nos tememos que acaben pagando os veciños”.
Por último, Pino sinalou que para culminar “este cuadrimestre negro” para Nigrán os veciños van comezar a sufrir unha subida, a partir de 2024, do 20% nos recibos do IBI, “pasando o noso concello a ter a taxa máis alta da comarca do Val Miñor co único obxectivo de recadar máis diñeiro para os crecentes salarios do goberno local, os gastos cada vez maiores en festas, os cuestionables gastos adxudicados a dedo durante este período electoral e as débedas dunha malísima xestión económica que, no último ano, lanza un resultado negativo de 510.000 euros”.
“Desde o PP de Nigrán imos incrementar e intensificar o noso labor de fiscalización do goberno local porque percibimos un gran descontrol e certos intereses particulares e unha xestión completamente errática que máis parece unha fuxida cara a adiante que o labor de goberno dun dos concellos máis importantes da provincia”, concluíu.
