Comisións de Festas de toda a provincia de Pontevedra, desde a zona do Val Miñor, Oia, Salvaterra, Tui, Ponteareas, Redondela, Porriño, Tomiño, Salceda de Caselas ou Soutomaior, déronse cita este venres no Centro Cultural de Donas en Gondomar para falar da nova Lei de Xogo de Galicia, que fará imposible que se sigan realizando os bingos que tradicionalmente veñen celebrando as Comisións de Festas para a organización das festas populares, equipos de fútbol ou centros culturais. Varias Comisións de Festas que estaban presentes xa suspenderon os bingos que ían celebrar esta fin de semana, xa que ata novo aviso non se poderán realizar. Así mesmo, as Comisións de Festas que celebren os seus bingos sen autorización poderán ser denunciadas. A próxima asemblea terá lugar o próximo 20 de outubro ás 22:30 horas, de novo no Centro Cultural de Donas.
