Este xoves entregáronse en Gondomar, nun acto celebrado en Casa Peralba, os diplomas acreditativos aos participantes nos obradoiros duais “Coidando Miñor II”. Nesta edición impartíronse as especialidades de “atención sociosanitaria a persoas maiores” e “servizos de limpeza e xestión de residuos urbanos” e participaron un total de 20 persoas, principalmente mulleres, que se atopaban en situación de desemprego, nos que durante 12 meses recibiron formación teórica e práctica de maneira remunerada.
Seis profesionais conformaron o equipo directivo; un director, unha titora, unha administrativa, e unha docente para cada unha das especialidades. Trátase dun obradoiro financiado a través dunha subvención de 503.000 euros concedida pola Xunta de Galicia, na que cada un dos tres concellos miñoráns, Gondomar, Nigrán e Baiona achegan 5.000 euros, e que se celebraron no Concello de Gondomar, que proporcionou ademais o apoio loxístico e de espazos necesarios.
No acto de clausura e entrega de diplomas participaron os alcaldes de Nigrán, Juan González, o de Baiona Jesús Vázquez Almuiña, e o de Gondomar Paco Ferreira, que actuou de anfitrión do acto. Ademais en representación da Xunta de Galicia estivo presente o Delegado Territorial de Emprego Jose Antonio Fernández.
Nas súa intervención o alcalde de Gondomar tivo palabras de agradecemento á Xunta de Galicia “por apostar por este tipo de obradoiros que permiten a capacitación e a inserción laboral de persoas, principalmente mulleres, que ademais de recibir unha titulación teñen unha remuneración durante un ano”. O rexedor tamén quixo “destacar a labor de todo o corpo docente e do seu director polo gran traballo realizado durante estes doce meses”.
Por último Ferreira quixo destacar “a gran porcentaxe de inserción laboral, que chega case ao 100%, o que demostra o prestixio que alcanzaron estes obradoiros”.
