Finalizou nas Rías Baixas o Mundial de J80 Baiona 2023, proba organizada polo Monte Real Club de Yates co patrocinio de Turismo de Galicia e Galicia Calidade, e na que se deron cita máis de 400 regatistas de 43 nacionalidades. Un evento que recalou por primeira vez en Galicia e no que o equipo cántabro-canario Eurofrits & Aviko Newindfoods fíxose co ansiado título intercontinental.
Todo apuntaba a que a xornada final volvería ser en grao sumo complicada no que respecta ás condicións meteorolóxicas. O comité de regatas tentouno ata o final, chegando mesmo a iniciar o procedemento para unha última proba no campo de regatas das illas Cíes. O vento, con todo, non facilitou a competición este sábado e o Mundial deuse por finalizado ás catro da tarde sen que se puidesen completar as últimas probas do programa.
Os resultados provisionais convertéronse por tanto en definitivos e o Eurofrits & Aviko Newindfoods, que competiu baixo as grímpolas dos Reais Clubs Marítimo de Santander e Náutico de Gran Canaria con Javier Padrón aos mandos, proclamouse definitivamente campión do mundo de J80 en Baiona.
“A verdade é que estamos súper contentos coa vitoria. Levamos toda a semana traballando moi duro e o resultado é un pouco o culme dunha semana ben feita. A tripulación traballou incrible, súper concentrada en cada regata e cando as cousas custan parece que a vitoria sabe mellor”, declarou Padrón e engadiu: “A organización envorcouse na auga cun equipo de moita calidade e iso notouse na regata”.
Armado por Daniel de la Pedraja e cunha tripulación formada por dous canarios (Javier e Alberto Padrón), dous cántabros (Jon Larrazabal e Lucía González) e un galego (Eduardo Reguera), o equipo foi de menos a máis desde a primeira xornada de Mundial, sumando en total catro vitorias parciais e dous segundos postos nas oito probas completadas, logrando así unha ampla vantaxe de 22 puntos sobre o segundo clasificado.
Por detrás, a prata intercontinental adxudicoulla o barco galego armado por José Luis Freire. O Marnatura (MRCYB), que contou co vigués Luis Bugallo á cana, estreouse de forma discreta e foi co paso dos días cando comezou a remontar ata situarse de forma definitiva no segundo caixón do podio.
“Estamos moi contentos como foi a regata, a verdade é que foi totalmente inesperado para nós ter un resultado tan bo. José Luis Freire, ‘Tibu’, puxo toda a carne no asador para sacar adiante este magnífico proxecto e sen dúbida estamos moi agradecidos”, declarou Bugallo.
A terceira posición ocupouna finalmente o cántabro Solintal (RCM Santander), armado e patroneado por Ignacio Camino. O equipo, que chegou a liderar a xeral tras a disputa das dúas primeiras xornadas clasificatorias, foi o encargado de pechar un apertadísimo podio que sufriu constantes cambios durante a competición.
En palabras de Camino, “o resultado valorámolo moi positivamente, porque foi un campionato moi complicado en canto ás condicións e houbo un nivel moi alto de competidores. Foi un Mundial moi aberto, exceptuando ao vencedor que o tivo máis fácil polos resultados, pero nós estamos moi contentos en termos xerais xa que o noso obxectivo principal era entrar no podio”.
Ademais do título na xeral absoluta, o Mundial de J80 tamén se puxo en xogo para outras cinco categorías que este sábado proclamou aos seus novos vencedores: o Kotablue Fibra Coruña 14/18 de Miguel Fernández (RCN Coruña) en Corinthian, o Dorsia Covirán armado por Nuria Sánchez na Mixta, o Team Balearia de María Bover (RCN Palma) na Feminina, o francés Telesto Ecole Navale de Paul Louseau en Xuvenil; e o cántabro Mercury Avator de Jaime Piris (RCM Santander) en Master.
Unha vez finalizada a competición celebrouse a entrega de trofeos nos xardíns do Monte Real. O acto, que estivo presidido por José Luis Álvarez, presidente do club anfitrión, contou tamén coa presenza de Xosé Manuel Merelles, director de Turismo de Galicia; José Manuel Heredia, presidente de Galicia Calidade; Jesús Vázquez Almuiña, alcalde de Baiona; Marta Fernández Tapias, vicepresidenta da Deputación de Pontevedra; Inés González Megido, xefa de mariña e pesca de Repsol; e Alejandro Retolaza, vicepresidente do Monte Real.
Como broche final para a gran cita da tempada en Galicia, regatistas, patróns e armadores reuníronse por última vez no village do Monte Real para gozar dun espectáculo de fogos artificiais e degustacións dos mellores produtos galegos, un día máis de man de Galicia Calidade.
O Mundial J80 Baiona 2023 celebrouse baixo a organización do Monte Real Club de Yates de Baiona co patrocinio de Turismo de Galicia e Galicia Calidade. A competición contou, ademais, coa colaboración de Deporte Galego, Deputación de Pontevedra, Repsol, Concello de Baiona, Terras Gauda e Gestilar.
