O Hospital Álvaro Cunqueiro inaugurou hoxe a “Exposición de pintura itinerante de Adicam” con obras doadas á devandita Asociación de Diagnosticadas de Cancro de Mama e Xinecolóxico. A mostra foi inaugurada polo xerente da Área Sanitaria de Vigo, Javier Puente, e contou coa participación da xunta directiva de Adicam; da xefa territorial da Sanidade, Natalia Botana; e da coordinadora da Unidade de Patoloxía mamaria, Rosa Mallo.
Trátase dunha selección de 20 pinturas ao óleo cunha temática común, a exaltación da imaxe da muller. A mostra, sita na área de Consultas externas (planta -1) do hospital, permanecerá exposta ata finais de outubro para conmemorar o Día Internacional do Cancro de Mama.
Adicam, Asociación de Diagnosticadas de Cancro de Mama e Xinecolóxico, con 22 anos de historia, leva unha década asociando a súa actividade de apoio e acompañamento ás pacientes con estas patoloxías coa exaltación da imaxe da muller a través da pintura. Así, a Asociación realiza diversos certames e exposicións artísticas co obxectivo de visibilizar o seu traballo e concienciar da importancia destas enfermidades.
