O alcalde de Baiona, Jesús Vázquez Alumiña, recibiu no Concello ao cónsul xeral de Uruguai en Galicia e a zona norte de España, Ramiro Rodríguez Bausero. Os lazos de Baiona con Uruguai son estreitos con raíces fondas na emigración. O rexedor baionés apunta que “nesta visita institucional estivemos a analizar as relacións pasadas entre estas dúas terras, pois o Uruguai foi país de acollida de numerosas familias galegas, moitas delas de Baiona e do Val Miñor, nos séculos XIX e XX. Tamén examinamos as relacións presentes e futuras entre Baiona e a República Oriental do Uruguai: A nosa intención é manter vivos os contactos de futuras colaboracións como a que terá lugar o próximo 12 de setembro en Baiona, escenario da Xira 20 Aniversario da Banda de Gaitas ‘Irmandade’ do Centro Social Cultural e Deportivo de Bolos Valle Miñor en Montevideo”.
A cita será na Praza do Concello ás 19:00 horas e os veciños e veciñas poderán gozar da música da Banda de Gaitas “Irmandade” do Centro Social Cultural e Deportivo de Bolos Valle Miñor en Montevideo (Uruguai), que ofrecerá unha xira de actuacións por Galicia no mes de setembro para celebrar os 20 anos da súa fundación, cando foi creada por descendentes de emigrantes galegos co obxectivo de continuar coa tradición musical dos seus pais e avós e promover a gaita tradicional galega.
Durante 20 anos, por esta formación pasaron distintas xeracións de descendentes galegos, desde nenos ata adultos. Hai que destacar que é a única banda de gaita galega que existe en Uruguai, que durante o ano participa en actividades do Centro Valle Miñor e doutras asociacións da colectividade galega e española en Uruguai. Desde os seus inicios, a Banda de Gaitas “Irmandade” estivo dirixida por Vicente Carlos González Siri, fillo dun inmigrante da zona de Baiona (concretamente de Media Aldea, Belesar) que foi un destacado alumno do gaiteiro Celestino Pichel e tamén imparte clases en distintos Centros galegos de Uruguai.
