O Partido Popular de Nigrán, a través da súa portavoz municipal María José Pino, denuncia a actual situación das prazas de aparcamento e a calamitosa xestión dos aparcadoiros públicos por parte do goberno socialista. Pino lembra que ao longo dos últimos anos veuse anunciando a apertura de aparcadoiros públicos gratuítos en zonas de gran afluencia como A Ramallosa, Nigrán e Praia América. Estas aperturas foron apoiadas desde o grupo popular municipal, pois se considerou positivo e necesario para o comercio local e o turismo a dispoñibilidade de aparcamento gratuíto para os veciños e visitantes. “Con todo, unha vez máis, o goberno municipal demostrou a súa nula capacidade de xestión máis aló dos anuncios e titulares grandilocuentes, como demostran as noticias que se foron coñecendo”.
Hai poucas semanas informouse do peche do aparcadoiro de 4000 metros cadrados aberto en Praia América no ano 2021, que contaba con 300 prazas de aparcamento e facilitaba dunha maneira importante o desconxestionamento do tráfico na zona. Ante esta situación, desde o Concello de Nigrán non se deu ningunha explicación e como única alternativa iniciaron unha campaña para potenciar o uso do “Nigránbus”, “aínda a propósito de que o servizo carece completamente tanto de capacidade como de frecuencias diarias para ser unha alternativa viable”.
“A maiores, o pasado 6 de xullo coñeciamos a través da prensa a noticia do peche do leiraparking situado no centro urbano de Nigrán, que dispoñía de 2500 metros cadrados e unhas 150 prazas de aparcamento. Desde a corporación municipal achacouse o peche ás demandas económicas por parte dos donos da parcela, chegando a dicir que estes esixían cuadriplicar a contía do alugueiro. Posteriormente sóubose, atendendo a declaracións dos propios donos, que desde a corporación socialista de Nigrán houbo un incumprimento flagrante das cláusulas do contrato de alugueiro desde o primeiro día, chegando a forzar unha prórroga do mesmo por período dun mes enganando aos propietarios co fin de ocultar o peche inminente do aparcadoiro durante a campaña electoral. Como alternativa, e unha vez máis informando con grandes titulares, o alcalde Juan González anunciou a apertura doutro aparcadoiro público gratuíto na zona, situado nunha parcela de titularidade municipal, aínda que ocultando que conta cun menor tamaño que o existente ata o momento”, apunta María José Pino.
Desde o Partido Popular de Nigrán denúnciase a perda de máis de 400 prazas de aparcamento gratuítas nas últimas semanas e o deixamento e incompetencia mostrada por parte dos responsables municipais, e esixe a procura de alternativas, especialmente para as zonas de Praia América e Panxón, que en época estival soportan unha enorme afluencia de turistas.
