As persoas cegas de Galicia utilizarán un kit de voto accesible para votar en segredo nas eleccións xerais do próximo 23 de xullo. A Delegación da ONCE foi o escenario no que se realizou unha demostración de como votarán estas persoas. O delegado do Goberno en Galicia, Pedro Blanco Lobeiras; Corina Alfonso Mañá, conselleira territorial da ONCE en Galicia e promotora de Braille; a subdelegada do Goberno na Coruña, María Rivas López; e a coordinadora de Formación da Federación de Asociacións de Persoas Xordas de Galicia, Emma Blanco, e o secretario xeral da Delegación do Goberno, Alberto de la Fuente, participaron nesta demostración do kit de voto accesible. Un total de 97 persoas cegas solicitaron este sistema de votación en Galicia.
As persoas cegas que solicitasen o kit de voto accesible utilizarán un maletín que inclúe as instrucións explicativas sobre o uso da documentación, editado en braille; e papeletas e sobres electorais estándar, acompañados de documentación complementaria en braille. Unha vez seleccionado o sobre que se desexe, o votante extraerá a papeleta e introduciraa no sobre normalizado. Con respecto á papeleta do Senado, esta vai dentro dunha plantilla especial marcada en braille, que permite ao votante sinalar cun bolígrafo ata tres candidatos; tras isto, hase de retirar a papeleta do interior da plantilla, e introducila no sobre normalizado correspondente.
Ambos sobres normalizados serán entregados polo votante ao presidente da mesa para que o introduza na urna, ou ben o mesmo poderao facer directamente. Utilizarán este kit as persoas cegas ou con discapacidade visual que teñan recoñecida unha discapacidade igual ou superior ao 33 por cento, ou que estean afiliadas á ONCE e que coñezan o sistema de lectoescritura Braille. O elector ou electora comparecerá o día das eleccións na súa mesa electoral onde, previa presentación do DNI, entregaráselle o kit de votación accesible solicitado.
