A Concelleira de Deportes de Baiona, Ana María Iglesias Rodríguez, e o Concelleiro de Actividades Marítimas, Joaquín López Goce, achegáronse a visitar aos participantes na “Semana Verde 2023”, co obxectivo de coñecer de primeira man as súas impresións. Máis de cincuenta escolares baioneses participaron nas actividades que durante tres días realizáronse no Cámping da Ladeira do 26 ao 28 de xuño. As pequenas e os pequenos gozaron de tres xornadas moi divertidas consistentes en actividades de lecer, xogos e outras de carácter informativo onde o coñecemento da fauna, flora e historia da nosa contorna completaron o programa.
Así mesmo, onte iniciouse a campaña de fomento dos deportes náuticos “Semana Azul 2023” na Praia da Ladeira. Entre as actividades que poderán gozar os escolares atópanse a vela lixeira, surf, pádel surf, piragüismo, kite surf e windsurf. Unha oportunidade única para gozar do deporte, do mar e de Baiona. Ambas as dúas actividades son ofertadas pola Concellería de Deportes do Concello de Baiona de forma gratuíta para os escolares do municipio.
