A Entidade Local Menor de Morgadáns vivirá este domingo 18 de xuño o tradicional curro da parroquia. Os gandeiros xuntan os equinos na parte alta do monte, para logo baixalos ao recinto, onde entrarán ao “curro” ao mediodía. Tras a celebración da comida campestre, pola tarde, a partires das 17:00 horas aproximadamente, serán as tarefas de separalos, desparasitalos, marcalos, cortarlles as crins, para ao final, volver deixalos en liberdade, todo no medio dunha festa popular.
A celebración do curro sempre é unha boa oportunidade para achegarse a vivir de preto a que, posiblemente, sexa a maior das celebracións tradicionais de Galicia, na que se conxuga a beleza do espazo natural coa heroicidade dos “aloitadores” e a festividade da comida campeira e o bulicio da música. O curro de Morgadáns desenvólvese no chamado lugar das Fechaduras na ladeira do Monte Aloia, na vertente orientada cara o Val Miñor. Na edición do ano pasado se “baixaron” un centenar de cabalos.
