A terceira edición da Vigo Copa España será este domingo moito máis que o peche do certame estatal. Despois de que os gañadores en 2021 e 2022 da cita organizada pola entidade presidida por José Luis Chamorro desen o salto ao campo profesional, o triunfo na proba olívica terá un significado especial. Para lograr unha vitoria do máximo prestixio, os principais talentos do pelotón elite e sub23 terán que ofrecer o mellor do seu repertorio nun percorrido tan espectacular como esixente.
Os detalles do itinerario que os ciclistas empezarán a cubrir a partir das 09:45 horas, con saída na Praza do Rei, desvelaranse este xoves na presentación oficial do evento. O trazado deseñado polo Vigo-Rías Baixas será similar ao do ano pasado, coa ascensión aos portos máis soados do sur da provincia de Pontevedra. O “muro” da Madroa repetirá por segunda tempada consecutiva como broche de ouro da carreira e da Copa España.
Se na estrea desta cita fíxose coa vitoria o catalán Marc Brustenga, actualmente nas filas do conxunto estadounidense Trek-Segrafedo, na segunda edición impúxose o valisoletano Alejandro Franco, quen horas despois de gañar en Vigo era anunciado como novo corredor do Burgos BH. Á marxe da súa relevancia deportiva como trampolín ao profesionalismo, a proba que transitará por doce concellos da provincia de Pontevedra inxectará un retorno directo á economía da área e poderá seguirse en directo a través da retransmisión en streaming de Emesports. Á súa difusión mediática tamén contribuirá o resumo que emitirá Teledeporte.
Asier, oitavo na xeral
A falta de dúas xornadas para a súa conclusión, a do próximo sábado en Padrón e ao día seguinte en Vigo, a Copa de España ten entre os seus dez primeiros clasificados a un representante do conxunto flúor. Asier González mantivo o seu posto dentro do top-10 este domingo na Pissei-Memorial Pascual Momparler. O burgalés foi un dos tres pupilos de Jesús Blanco Villar que alcanzou a liña de meta no pelotón principal.
A oitava proba do certame coordinado pola Real Federación Española de Ciclismo resolveuse ao sprint despois de 162 quilómetros polas estradas da provincia de Valencia. Asier González ocupou a 30ª posición, o que lle achegou once puntos para a xeral, clasificación na que perdeu unha praza. Co mesmo tempo que o gañador tamén concluíron Miki Valls, 40º, e Martín Barrero, 47º. O uruguaio Thomas Silva (Caja Rural-Alea) reforzou a súa condición de líder e todo apunta a que o vindeiro domingo será coroado como vencedor final da Copa de España no podio da Madroa.
