Un total de 350 deportistas de toda Galicia protagonizarán esta fin de semana o seu primeiro trail “5 Miradoiros” do Concello de Nigrán, unha proba deportiva polas parroquias do interior do municipio que fusiona natureza e vistas espectaculares desde o Pericoto do Vilar, Sanomedio, Estripeiro, Outeiro das Señoras e Montecastelo. A recollida de dorsais pode realizarse este venres 21 de 17:30 a 21:30 horas no Decathlon do Centro Comercial Nasas ou media hora antes da proba do sábado e 1,5 horas antes da do domingo.
O evento comezará o sábado 22 de abril pola tarde cunha proba de ascensión e escalonada de 3,5 km con saída ás 17:00 horas desde Camos (rúa Xuncido, cortando media hora a rúa San Roque) e chegada á caseta dos cazadores, no cumio da parroquia. O domingo 23 pola mañá serán tres probas (trail longo de 25 km, curto de 13 km e andaina de 13 km) e a saída e a meta serán Chandebrito, pasando en tódolos casos por Camos, Chandebrito, Priegue e Parada. Para esta xornada do domingo disporase de duchas, servizo de gardería infantil previa solicitude en https://razapalleira.com/trail-5-miradoiros/ e comida para os participantes. A entrega de trofeos está prevista ás 14:00 horas.
“Cubrimos o número de prazas máximo porque é evidente que o atractivo da proba é inmenso e resume o noso lema ‘Nigrán, Equilibrio Natural’: deporte, natureza e vistas espectaculares nunha contorna do noso municipio máis descoñecida e que vai sorprender moitísimo aos participantes”, considera o rexedor, Juan González. O evento estará marcado pola normativa da Federación Española de Deportes de Montaña y Escalada (FEDME).
