Os festivos desta semana, unido ás vacacións escolares, son propicios para os desprazamentos por estrada. De feito, a DXT estima que esta semana Santa produciranse uns 16 millóns de desprazamentos en toda España (aproximadamente un millón e medio en Galicia). Especialistas de Irenea, o Instituto de Rehabilitación Neurolóxica de Vithas Vigo, elaboraron un decálogo para optimizar a capacidade motora, cognitiva e emocional, que inflúen, todas elas, na condución. Os accidentados de tráfico constitúen unha alta porcentaxe dos pacientes de Irenea, un referente na recuperación de pacientes con dano cerebral adquirido, unha das principais secuelas da sinistralidade viaria.
Así, desde o Hospital Vithas Vigo, a Dra. Belén Moliner, directora médica de Irenea, sostén que a condución é unha das tarefas cotiás máis complexas para o cerebro humano, xa que “implica a posta en marcha de moitas capacidades motoras, cognitivas e emocionais; require de capacidade e agudeza visual; pon a proba a memoria; e a toma de decisións en base a nosa propia percepción das distancias e velocidades”.
Moliner tamén puntualiza que, ao volante, debemos ser plenamente conscientes do noso estado psicofísico e emocional para detectar e interpretar correctamente os signos de fatiga ou falta de concentración que poidan minguar as nosas capacidades, xa que non só está en xogo a saúde do condutor, senón tamén dos demais ocupantes do vehículo e dos outros condutores da estrada. Por iso, é importante estar sempre alerta e tomar medidas para evitar accidentes e, para iso, é clave a concentración e a atención.
“A concentración e a atención son habilidades cognitivas fundamentais que nos permiten enfocar a nosa mente nunha tarefa específica e manternos alerta e receptivos á información relevante. No contexto da condución, a concentración e a atención son cruciais para tomar decisións rápidas e precisas e evitar accidentes. Cando conducimos, a nosa atención debe estar constantemente enfocada na estrada e no tráfico que nos rodea, e debemos estar preparados para reaccionar ante calquera eventualidade. Se perdemos a concentración ou a atención, podemos tardar máis en reaccionar a unha situación perigosa, o que aumenta o risco de accidente”, asegura a Dra. Belén Moliner, directora médica de Irenea.
Decálogo
Para estar alerta e manter a mente enfocada na tarefa de conducir; e para poder reaccionar rapidamente ante calquera situación inesperada na estrada, os expertos de rehabilitación neurolóxica de Vithas Vigo trasladan como primeira recomendación do seu decálogo, eliminar as distraccións, como falar por teléfono, ler ou enviar mensaxes de texto, comer ou beber ao volante. Tamén propoñen manter a vista enfocada na estrada, evitando mirar aos lados ou cara atrás.
O terceiro punto do decálogo aconsella programar antes de empezar a conducir o navegador e non manipulalo mentres se conduce. Descansar o suficiente antes de conducir permite estar alerta e concentrado; mentres que manter unha postura cómoda reduce o cansazo mentres se conduce.
En sexto lugar, os especialistas do Hospital Vithas Vigo aconsellan evitar o consumo de alcol e outras drogas, xa que “pode afectar á túa capacidade de atención e concentración mentres conduces”. Por outra banda, manter a distancia axeitada cos demais vehículos permite ao condutor anticipar situacións de risco e actuar en consecuencia.
Practicar unha condución defensiva, é dicir, estar sempre alerta e preparado para reaccionar ante situacións imprevistas ou perigosas, é o oitavo consello. O decálogo propón manter un ambiente fresco e ventilado no vehículo, xa que axuda a manter a atención e evita a somnolencia.
Por último, hai que ter en conta que o consumo dalgúns medicamentos pode afectar á capacidade de condución, aumentar o risco de fatiga e a somnolencia, coa consecuente perda de atención.
16 millóns de desprazamentos
A Dirección Xeral de Tráfico estima que esta semana Santa haberá, nas estradas españolas, 16 millóns de desprazamentos, dos que, aproximadamente millón e medio produciranse nas estradas galegas. Segundo o balance do Ministerio do Interior nestas datas do ano pasado contabilizáronse 3 falecidos e 77 feridos.
“O 75% dos lesionados de tráfico, que pasan polo Instituto de Rehabilitación Neurolóxica de Vithas, logran ser independentes ao alta. Porcentaxe que se debe ao noso protocolo de actuación que se centra nunha valoración minuciosa periódica e distintos programas terapéuticos en función das necesidades individuais do paciente”, sinala o Dr. Joan Ferri, director xeral de Irenea.
Vithas Vigo pola súa banda é un hospital de referencia en Galicia no paciente accidentado de tráfico e conta cunha Unidade específica para o tratamento integral destes pacientes, tanto desde o punto de vista asistencial, como o administrativo. De feito, o modelo do Hospital Vithas Vigo foi recoñecido como modelo a seguir polos hospitais privados no informe “A xestión asistencial dos accidentados de tráfico. Evolución, liñas vermellas e retos futuros”, publicado pola Fundación Saúde Global en febreiro de 2016.
