Un ciclista que conta no seu palmarés co título de campión de Estados Unidos Sub-23 convértese na primeira fichaxe do Vigo-Rías Baixas para o seu novo proxecto. O norteamericano Keewan Swirbul incorpórase á escuadra presidida por José Luis Chamorro procedente do conxunto profesional Human Powered Health. Trátase, sen dúbida, dun dos reforzos de maior nivel do equipo flúor nos seus dez anos de historia.
Antes de descubrir o ciclismo de competición Swirbul foi campión do mundo júnior de esquí. O seu potencial físico levou ao Axeon Cycling Team, o afamado equipo de formación propiedade de Axel Merckx, a ofrecerlle a oportunidade de dar o salto ao máximo nivel sen participar nunca nunha carreira de estrada.
Os resultados obtidos sobre o asfalto no campo profesional falan por si sós da calidade do escalador de Colorado, de 27 anos. En 2019 terminou segundo na clasificación xeral do Circuíto de Langkawi e nesta última campaña, ademais do seu décimo posto no campionato de fondo de Estados Unidos, completou carreiras como O Gran Camiño, o Circuíto de Suíza, a Volta a Portugal e a Cro Race, sendo en todas elas un dos mellores clasificados do Human Powered Health, equipo norteamericano da categoría UCI Pro Team.
Un cambio de filosofía da estrutura á que Swirbul pertenceu durante os tres últimos anos, que decidiu envorcarse nos finais ao sprint, ofreceu ao Vigo-Rías Baixas unha oportunidade que hai uns meses era impensable. O corredor afincado en Suíza recibiu a noticia de que o seu contrato non ía ser prolongado unha vez que concluíu a tempada. Cos persoais dos equipos profesionais practicamente pechados, e rexeitando ofertas para regresar ao seu país dado que a súa preferencia é seguir en Europa, aceptou a proposta olívica para relanzar a súa carreira.
Este acordo permite á entidade flúor volver dispoñer no seu persoal Elite-Sub23 dun ciclista dunha categoría superior, da mesma maneira que sucedeu no seu día con Willem Smit, “Chava” Angulo ou Benjamí Prades. A primeira alta de fronte ao 2023 apontoa a ambición do plan deseñado pola directiva. A renovación vai ser profunda tanto no cadro de corredores como no staff técnico.
