O Solventis Ribadeo liderado por Malalo Bermúdez de Castro deu a sorpresa este sábado na Liga de Outono Gestilar J80 vencendo con contundencia na única proba disputada. O bo facer do recoñecido patrón coruñés, ao que deron soporte Alberto García á táctica, e Eduardo Mosquera e Lorena Freitas completando tripulación; valeulle ao equipo para subir da quinta á terceira posición, acurtando distancias con respecto ao líder, do que lle separan agora 8 puntos.
Na cabeza da liguiña de monotipos mantense o Alboroto de Juan Carlos Ameneiro, ao que o triplete de primeiros postos que logrou na xornada anterior permitíronlle compensar o oitavo debido a que asinou este sábado en Baiona, nunha etapa moi frouxa para o que adoita ser habitual para este equipo, campión de España da clase J80.
Con 11 puntos en carteira, o Alboroto segue líder seguido, iso si, moi de preto, polo Bica de Chisco Catalán, un dos barcos que máis solidez está a demostrar nestas primeiras probas da competición. Ten 13 puntos derivados duns parciais bastante bos, de 2-2-7-2.
A subida do Solventis Ribadeo da quinta á terceira posición, con 19 puntos, provocou a caída en escaleira dos seguintes clasificados. O I3D Atlántico, de Guillermo Blanco, que ía terceiro, vai agora cuarto con 24 puntos; e o Cansino de Nano Yáñez, que ía cuarto, pasa á quinta posición con 26 puntos.
É o Top 5 dunha competición que este sábado viviu na baía de Baiona a súa segunda etapa cun programa acurtado, xa que o vento, que non tardou en desaparecer, só permitiu a celebración dunha das tres probas previstas en programa. A manga, un percorrido barlovento sotavento de dobre volta, disputouse cun suroeste duns 8 nós de media.
A Liga de Outono Gestilar J80 volve ao escenario en 15 días, o próximo 26 de novembro.
