Máis de 30 voluntarios participaron este pasado domingo na XV Limpeza Simultánea “Móllate polos ríos” que en colaboración con ADEGA se levou a cabo nos ríos de Gondomar e de outros 40 Concellos de Galicia. Foron retirados máis de 1.000 quilos de residuos de cristais, plásticos, diferentes envases, restos de obra, e pneumáticos entre outros.
O Proxecto Ríos é un programa de Educación e Voluntariado Ambiental que ten a finalidade de dar a coñecer o importante papel dos cursos fluviais, amosar as súas problemáticas así como fomentar iniciativas que permitan á cidadanía o mantemento e a mellora dos ríos proporcionando as ferramentas que garantan a súa participación.
Dende o Concello de Gondomar o alcalde quixo “dar as grazas a cantos participaron nesta xornada de limpeza que ademais pretende servir para concienciar da importancia do coidado do medio ambiente e dos nosos ríos, que son sen dúbida un dos nosos máis valiosos patrimonios”.
