Aberta a inscrición para participar na carreira pola praia “Nigrán Area”

Concello de Nigrán e a Sociedade Atlética Val Miñor, coa colaboración da Deputación de Pontevedra, Federación Galega de Atletismo e Deporte Galego, retoman o sábado 13 de agosto a 11ª edición da “Nigrán Area”, carreira popular de atletismo pola praia que é xa un referente da programación estival e deportiva na comarca. O prazo de inscrición para esta tradicional carreira por Panxón e Praia América está aberto en http://www.carreirasgalegas.com ata o 9 de agosto ás 23:59 horas. A proba retoma a normalidade prepandemia tras non celebrarse no ano 2020 e realizarse baixo medidas de seguridade Covid no 2021.

O evento deportivo arranca ás 10:00 horas e está aberto a tódalas categorías, tendo saída desde Panxón. Os sub 16 percorrerán 2 km, os sub 14 farán 1500 m, os sub 12 un quilómetro, os sub 10 percorrerán 500 metros, os sub 8 farán 300 metros e os máis pequenos farán 100 metros de xeito simbólico.

O percorrido para a proba absoluta son 6 km do areal de Panxón-Praia América cando a marea está baixa. A proba conta coa supervisión da Federación Galega de Atletismo. Contará con avituallamento ao remate, servizo de ambulancia, seguro de responsabilidade civil e seguro de accidente deportivo para os participantes.

As inscricións poden realizarse tamén a través da web da FGA dedicada ás carreiras populares http://www.carreirasgalegas.com (acceder a través da sección calendario).