O Concello de Nigrán vén de adxudicar os quioscos de praia do municipio por un importe total de 153.948 € con prezos de licitación que oscilaron desde os 30.525 € de Panxón aos 7.300 € do posto de churros de Lourido. A maioría deles comezarán a funcionar desde esta mesma fin de semana e ata o 30 de setembro. Os prezos mínimos mantivéronse iguais que o ano 2021, obtendo o Concello unha mellora nas ofertas de 60.548 €. En total, o Concello disporá coma nos anos anteriores de 7 quioscos de venda de xeados, refrescos e alimentos (2 en Patos, 1 en Area Fofa, 1 na Madorra, 1 en Panxón e 2 en Praia América) e 1 de venda de churros en Praia América. A novidade é que o espazo de ocupación nesta tempada se amplía lixeiramente ata poder ocupar os 70 metros cadrados.
“Temos que ter en conta que este é un servizo de praia que dá traballo a diferentes familias de Nigrán que tradicionalmente poxan por estes quioscos e, ao mesmo tempo, ofrecen un servizo que os cidadáns agradecen. Ademais, cómpre destacar que este verán volveremos a estar máis preto que nunca da normalidade anterior ao Covid, polo que a previsión de negocio é maior”, indica o alcalde Juan González.
Adicionalmente, o Concello de Nigrán contará este verán coa cafetería do complexo deportivo municipal Dunas de Gaifar (Panxón) aberta. Con este obxectivo a sacou a licitación tras sometela a unha ampla renovación cun investimento de 48.348 €. Os pregos están pendurados na Sede Electrónica-Perfil do Contratante en http://www.nigran.es e o prazo de presentación de propostas permanece aberto ata o 30 de Maio. Neste caso o canon mínimo é de 25.243,73 €/ano e o único criterio de adxudicación será a mellora do mesmo. “Este verán abrirá ao fin xa cunha imaxe totalmente renovada para ofrecer un servizo de calidade a veciños e visitantes nunha zona onde ademais existe demanda ao estar ao carón da praia e o centro de saúde”, explica o rexedor.
