O servizo de Cardioloxía de Ribera Povisa, en colaboración coa Fundación Biomédica Galicia Sur, impartirá a partir de hoxe mércores unhas xornadas formativas sobre electrocardiografía e dispositivos de estimulación cardíaca dirixidas a médicos, enfermeiras e técnicos en coidados auxiliares de enfermería da área sanitaria de Vigo. O obxectivo é “reforzar os coñecementos básicos”, en palabras da doutora Raquel Guerola, do grupo de Arritmias do hospital e responsable da consulta de Cardio-Oncoloxía. O número de inscritos supera xa o medio centenar.
O Covid deu un envorco ao escenario sanitario no que “todo o mundo tivo que facer de todo e moitos especialistas en Medicina enfrontáronse a pacientes que non están afeitos manexar”, explica a cardióloga Raquel Guerola, impulsora da iniciativa. A raíz precisamente dese novo marco “houbo moitos compañeiros que nos comentaron a posibilidade de facer un curso de refresco de electrocardiografía, mesmo desde as especialidades cirúrxicas”. Por iso é polo que as xornadas orientáronse a todos os niveis sanitarios, “desde o auxiliar que ten que facer o electro á enfermeira que, ou ben o fai, ou ten que tomar unha primeira decisión de avisar ao doutor en función da gravidade; tamén a médicos, sobre todo de Urxencias e Atención Primaria, ou persoal de quirófano que ten que saber manexar dispositivos específicos relacionados coa estimulación cardíaca, como cirurxiáns ou anestesistas”, detalla.
Os obradoiros prácticos, que empezan hoxe 25 de maio e terán continuidade os días 1, 8 e 15 de xuño, están abertos a todo o persoal sanitario da área de Vigo e impártense no hospital Ribera Povisa. O prazo de inscrición continúa aberto.
