A Copa de España reactívase este domingo cunha incorporación de nivel no Vigo-Rías Baixas. Vicente Hernaiz debuta coas cores do conxunto presidido por José Luis Chamorro na Clásica Cidade de Torredonjimeno. O ciclista valisoletano únese á formación flúor procedente do pelotón profesional.
Tras dar o salto de categoría o pasado verán dentro da estrutura do Eolo-Kometa, o corredor de Arroyo de la Encomienda iniciou esta tempada nas filas do Manuela Fundación. Coa única escuadra Continental UCI do ciclismo español disputou no arranque de 2022 probas como a Challenge a Mallorca, a Volta á Rexión de Murcia e a Clásica Xaén Paraíso Interior.
“Gerardo Chamorro levaba tempo querendo que viñese e ao final convenceume. Sei que aquí vou estar a gusto”, asegura Hernaiz sobre os contactos co xerente do Vigo-Rías Baixas e a súa decisión de regresar ao campo Elite-Sub23. O valisoletano, de 23 anos, competiu contra o conxunto olívico nas últimas campañas –“era un dos nosos principais rivais”, lembra- e defínese como un ciclista polivalente: “Subo, esprinto e rodo ben. Fago un pouco de todo”.
As probas da Copa de España, entre elas a que organizará o seu novo equipo o 15 de maio, serán o seu principal obxectivo durante os próximos meses. “Estou preparado”, indica sobre o seu estado de forma para participar este domingo na XXXVIII Clásica Cidade de Torredonjimeno. Na proba xienense compartirá aliñación con Pablo Ara, Asier González, Martín Rey, Yurgen Ramírez, Ángel Maneiro e Marcos García.
A quinta xornada do certame estatal ofrece un percorrido de 165 quilómetros. A ascensión ao porto de Locubín, de 1ª categoría, e de inmediato ao alto de Valdepeñas, de 2ª categoría e coa súa cima a 50 km da meta, serán os puntos máis esixentes dun trazado que na súa parte final presenta un perfil rompepernas. A saída darase ás 09:15 e a chegada está prevista para as 13:30 horas.
