A Asociación Veciñal e Cultural Chandebrito 1807, no marco da colaboración co CIS de Vigo, Secretaría Xeral de Institucións Penitenciarias desde o ano 2011, para o cumprimento de penas con traballos en beneficio da comunidade no ámbito territorial da parroquia de Chandebrito, vén de realizar desde o 22 de xaneiro ata o 5 de marzo (durante un total de 48 horas) as seguintes actuacións na zona:
– Limpeza das marxes dos camiños antigos do Campo Novo e do Soeido.
– Limpeza, roza e sinalización da contorna do muíño dos Matos (edificio, levada de auga, tellado, sendeiro de pés, etc).
– Recollida de lixo nas marxes e cunetas de diversas vías públicas.
– Sinalización horizontal parcial do roteiro histórico etnográfico de Chandebrito, deseñado no ano 2006.
– Tarefas de conservación e mantemento de varios indicadores de topónimos tradicionais (Cova de Lobo, As Pereiras, Pedra Grande…)
O camiño medieval do Soeido, catalogado como ben cultural, foi un dos que se mellorou, con actuacións de roza da maleza nas marxes, retirada de vexetación, lixo e entullos da superficie, entre outros.
