Tras dous anos sen festa, o barrio de Prado, na parroquia gondomareña de Morgadáns, honra esta fin de semana ao seu patrón, San Xosé, coas habituais actividades festivas. O programa comezou o sábado ao mediodía coa celebración da Santa Misa seguida de procesión acompañada pola charanga Vai de Baile. A continuación, Carlos Riveiro dirixiu as tradicionais “poxas”, nas que se puideron comprar desde plantas por entre 10 e 45 euros, polos ou coellos por entre 5 e 40 euros, ata un porco ou un cordeiro, por 130 euros cada un. Pola noite, a orquestra Miramar e a discoteca móbil Fabrik foron as encargadas de amenizar a verbena. A festa rematará hoxe domingo coa actuación do trío musical 3.com, ás 20:00 horas.
Festas da Virxe da Soedade
A derradeira fin de semana de abril celebraranse as festas na honra da Virxe da Soedade. O venres 29, as orquestras París de Noia e Marbella amenizarán a verbena, e o sábado día 30, a música correrá a cargo da orquestra Los Magos e o grupo La Banda de Ayer. O domingo 1 de maio comezará coas tradicionais “poxas”, ás 10:45 da mañá, de novo a cargo de Carlos Riveiro. Ás 13:00 horas celebrarase a Santa Misa con procesión acompañada pola Banda de Música do Val Miñor, que ofrecerá un concerto ao finalizar. Os festexos rematarán ás 20:00 horas coa actuación da Banda de Música do Val Miñor e a banda de mariachis Noche de Ronda.
