O Concello de Nigrán ven de investir 9.595 € na renovación da pista multideportes situada na Alameda de A Ramallosa. Concretamente, mudáronse os 280 metros de céspede artificial por outro novo de mellor calidade coas marcaxes en branco e, ademais, substituíronse os taboleiros danados do peche perimetral por outros. O resultado é unha cancha para practicar deporte en óptimas condicións.
“Trátase dun dos espazos deportivos con máis uso de todo o municipio e, loxicamente, xa presentaba desgastes”, sinala o alcalde, Juan González, quen defende este tipo de instalacións ao aire libre e de uso público como un dos mellores xeitos de promover o deporte.
Esta pista foi remodelada na súa integridade no ano 2017 cun investimento de 20.700 € por parte do Concello que permitiu o cambio por completo da estrutura por tubaxes de aceiro e taboleiros, muda da superficie, novas porterías e canastras… Naquel intre presentaba un estado de abandono e deterioro que motivaron esta rehabilitación.
