A dirección do Ribera Povisa completou hoxe os nomeamentos que estaban pendentes desde a saída de José David Zafrilla como xerente, e que se atrasaron pola necesidade de concentrar todos os esforzos na loita contra a pandemia.
Así, nomeouse ao Dr. Álvaro Pedrosa como adxunto á xerencia do hospital. Pedrosa traballa en Povisa desde 2006 e nos últimos once anos ocupou o cargo de adxunto á dirección asistencial. Agora, e en estreita colaboración co xerente, Rafael Cabadas, ocuparase das relacións do hospital cos seus clientes públicos e privados.
Por outra banda, a ata o de agora coordinadora da UCI, Sonsoles Leal, foi nomeada directora asistencial. Licenciada en Medicina pola Universidade de Navarra, é anestesista e traballa en Povisa desde hai 20 anos, onde ocupaba ata hoxe o cargo de coordinadora da UCI. É tamén coordinadora de transplantes do hospital, secretaria da Sociedade Galega de Anestesioloxía e coordinadora do grupo de traballo de COVID da Sociedade Española de Anestesioloxía.
Por último, Ana Vázquez, anestesista da UCI, foi nomeada coordinadora do bloque cirúrxico. A Dra. Vázquez traballa no hospital desde 2001 e desde 2016 foi xefa de sección de Cirurxía Maior Ambulatoria. Licenciada en Medicina pola Universidade de Santiago, realizou múltiples publicacións e tamén é integrante do grupo de Cirurxía Maior Ambulatoria da Sociedade Española de Anestesioloxía.
