O servizo de Uroloxía do hospital Ribera Povisa organizou o encontro nacional desta especialidade que reunirá a máis de 150 profesionais sanitarios este xoves 3 e venres 4 no Parador de Baiona. Foi a Asociación Española de Uroloxía (AEU) a que delegou nos facultativos do centro vigués a posta en marcha desta importante cita, a primeira que ten lugar de forma presencial desde o comezo da pandemia e na que se celebran de forma simultánea a XXIV Reunión Nacional do Grupo Uro-Androlóxico e a VI Reunión Nacional do Grupo de Cirurxía Reconstructiva Urolóxica.
“Son dous días nos que se falará de numerosos temas dos dous grupos de Uro-Androlóxico, ao que eu pertenzo, e de Cirurxía Reconstructiva Urolóxica. Esta última é sobre todo uretral e nós tratamos o corpo cavernoso, polo que ao estar todos xuntos aproveitamos para coñecer as últimas novidades das dúas seccións”, explicou o doutor Meijide, presidente do comité organizador, que conforman todos os especialistas do servizo de Uroloxía de Ribera Povisa, que dirixe Luis Fariña.
Ao longo das dúas xornadas abordaranse temas tan diversos como os fitos da cirurxía protésica uroxenital, as síndromes raras desta especialidade, a cirurxía estética e cosmética peneana, a medicina antienvellecemento, os problemas de disfunción eréctil ou a infertilidade, entre outros.
Ademais das mesas redondas e conferencias presenciais, tamén participarán de forma telemática prestixiosos expertos internacionais que presentarán os últimos avances no tratamento do cancro de próstata, implantes de pene por cuestións estéticas e non por patoloxías previas ou as novas técnicas reconstructivas.
