Un centenar de voluntarios participarán na #GranRecollida2021 que a Fundación Provincial Banco de Alimentos levará a cabo en supermercados da comarca do Val Miñor, do mesmo xeito que noutras superficies comerciais da provincia de Pontevedra. A campaña solidaria, que se desenvolverá do 19 ao 25 de novembro a nivel estatal e europeo, contará coa presenza física de voluntarios informativos os dous primeiros días, tanto o venres, día 19, como o sábado, 20.
Do mesmo xeito que na anterior edición, nesta #GranRecollida2021 non se recollerán alimentos físicos, aínda que si contarán con voluntarios en supermercados de Nigrán, Gondomar, Baiona, Sabarís e A Ramallosa. Todos eles estarán perfectamente identificados con petos do Banco de Alimentos e trasladarán ás persoas que acudan ás superficies comerciais que, como a edición anterior, non se pode recoller comida de maneira física.
Recadacións económicas para alimentos
Por motivos da pandemia, a #GranRecollida2021 volverá ser cento por cento virtual. Hai tres maneiras de colaborar: achegas económicas ao pasar pola caixa do supermercado, adquisición de cestas solidarias ou transferencia a través de www.bancoalimentosvigo.org e Bizum co código 01139.
Un ano máis, as superficies comerciais adheridas á #GranRecollida2021 xerarán un saldo froito desas doazóns a favor da ONG que será trocado por compras directas de alimentos ao longo de 2022. Cos 550.000 quilos de alimentos recadados durante a edición anterior, o Banco de Alimentos puido dar resposta a todas as necesidades xurdidas e, grazas a esa cifra récord de solidariedade nunca antes rexistrada, tamén se puido dar resposta ao incremento de persoas vulnerables ás que atenden.
Desde o Banco de Alimentos agradécese publicamente a implicación de todos os voluntarios que se mobilizarán no Val Miñor, xa que, grazas ao seu labor preténdese volver ao contacto directo cunha sociedade comprometida e xenerosa que sempre respondeu á chamada da necesidade máis próxima.
Este ano o padriño da #GranRecollida2021 é o actor vigués Pedro Alonso, recoñecido mundialmente pola súa interpretación de Berlín en La Casa de Papel de Netflix, aínda que leva toda a súa vida profesional envorcado á interpretación, á vez que tamén é pintor e escritor. O pasado 2 de novembro, o novo embaixador recibiu o peto de voluntario durante o seu acto de presentación celebrado en Vigo.
Actividade Banco de Alimentos
A Fundación Provincial Banco de Alimentos repartiu máis de 2 millóns de quilos de comida durante 2020, un 17 por cento máis con respecto ao ano anterior, debido ao estalido da pandemia e as súas negativas consecuencias. Xa no primeiros seis meses deste 2021, entregou máis dun millón de quilos de alimentos.
A ONG, apolítica e aconfensional, atende a máis de 20.000 persoas sen recursos na actualidade ás que chega a través das 150 entidades homologadas as que traballa. O seu principal obxectivo é cumprir cun dos dereitos humanos máis fundamentais: o acceso a unha alimentación suficiente, segura e saudable de maneira gratuíta.
