Inés Rey Torres co seu relato “Arte Vidriosa” recibiu este martes o premio que a acredita como gañadora da segunda edición do Certame de Relato Curto “O Enxeño Engaiolado” que organizaba a Concellería de Cultura de Baiona e o Arquivo Histórico e Biblioteca Municipal de Baiona.
Pola súa banda os relatos “Conto de Medo” de Julio E. Villarino Espino e “Un clic, dos clics, tres clics…” de Ignacio Carreras Ojea, completaban o cadro de gañadores e gañadoras deste certame. Ademais este ano introduciuse como novidade a categoría de conto infantil, na que resultou gañadora Fátima Míguez Lorenzo.
O alcalde de Baiona, Carlos Gómez, e a concelleira de Cultura, Miriam Costas, presidiron na tarde do martes o acto de entrega de premios, que tivo lugar no Patio de Peregrinos do Arquivo Histórico e Biblioteca Pública Municipal, onde se deron cita a galardoada e galardoados.
As autoras e autores dos tres relatos premiados na categoría de relato curto recibiron senllos cheques-libraría canxeables en librerías de Baiona ata o 31 de decembro de 2021. O primeiro premio consistía nun vale de 300 €; o segundo premio, 200 € e, finalmente, o terceiro premio, 100 €. En canto á categoría de conto infantil, recibiu un premio de 100 €. As obras gañadoras publicaranse na páxina web do Concello de Baiona: http://www.baiona.gal.
