Nigrán bonificará novamente o 75% do imposto de terrazas e mantén a flexibilización da súa ampliación

O Concello de Nigrán bonificará novamente o 75% do imposto de terrazas ante a persistencia da crise do Covid-19. Así, o alcalde de Nigrán, Juan González, asinou co presidente da asociación de empresarios Ovalmi, José Ángel González, unha prórroga do convenio de colaboración firmado no 2020 que contempla esta rebaixa e, ao mesmo tempo, a flexibilización da súa ampliación para garantir a seguridade sanitaria que obriga ao distanciamento social.

“Gustaríanos bonificar o 100% do imposto de terrazas pero é legalmente imposible, o máximo permitido é o 75%. Igualmente, reiteramos a nosa petición a Costas do Estado e da Xunta para que realicen estes descontos porque a eles lles corresponden as terrazas do paseo marítimo de Panxón e do peirao”, sinala o alcalde, Juan González, quen indica que “se manteñen todos os motivos para continuar apoiando á hostalaría ante a crise do Covid-19 que tamén limita o traballo do sector”.

A maiores, o Concello de Nigrán suma 240.000 € en fondos propios aprobados en tres liñas de axudas directas compatibles entre si para suavizar os efectos da crise económica na hostalaría e no taxi. Paralelamente, ofrece o servizo de reparto gratuíto para todos os negocios do municipio ata o 10 de outubro como fórmula de apoio ao comercio local. O Concello asume os custos do envío a domicilio mediante a contratación propia do servizo no termo municipal. Este funciona de mércores a sábados de 13:00 a 15:00 e de 21:00 a 23:00 horas e os domingos de 13:00 a 15:00 horas, coa novidade de que mércores e xoves inclúe non só ao sector da restauración, se non calquera tipo de negocio de Nigrán aínda que non sexa hostaleiro (volume transportable no caixón dunha moto). Como nas anteriores ocasións, os pedidos mínimos son de 15 € e cínguense ao termo municipal sen incluír a xestión dos cobros nin envíos de pedidos contratados a través de plataformas privadas. Os negocios interesados en sumarse deben solicitalo no correo comunicacion@nigran.org.