Vive Nigrán, na súa campaña “Vive Sostible”, celebrou este domingo unha xornada de limpeza en Praia América en colaboración co Concello. En menos de 2 horas recolléronse un total de 221 quilos de residuos. Estas limpezas, promovidas polo festival, volverán realizarse en xuño. Os interesados que non poidan asistir poderán seguir colaborando, xa que o Concello pon ao dispor da campaña un dos seus “peixes tragaplásticos” situado na proximidade do festival (está sinalado cun cartel identificativo), onde se poden ir depositando os plásticos atopados. O lixo recollido será utilizado nun futuro para unha acción sorpresa.
A V edición de Vive Nigrán impulsa accións de recollida e clasificación de residuos nas praias do municipio dentro da súa iniciativa “Vive Sostible”. Desde o seu inicio, a organización do festival tivo presente a necesidade de actuar con respecto ante a riqueza ambiental da contorna na que se desenvolve. Medidas como fabricar vasos reutilizables, garantir a seguridade na zona dunar ou actividades para os máis pequenos con obradoiros de reciclaxe así o testemuñan.
Nesta edición e seguindo diversos obxectivos incluídos na Axenda 2030 para o Desenvolvemento Sostible, Concello e organización quixeron incrementar o seu compromiso programando varias actividades que poidan servir para concienciar á sociedade, por unha banda sobre a necesidade de reciclar, a importancia da conservación do mar e as súas especies, e por outra banda para converter as nosas praias en espazos libres de plásticos.
“Vive Sostible” exporá diversas accións que se irán desvelando aos poucos e que están vinculadas coa conservación, concienciación e responsabilidade ambiental (compensación de pegada de carbono, etc). O obxectivo de todas estas accións é facer ver que o problema dos residuos no mar é moi grave e compete a todos; e que, entre todos, cidadáns, festivais e institucións públicas, é necesario darlle a volta e achegar solucións.
O consumo de plástico na nosa sociedade creceu de forma vertixinosa nos últimos anos. Os datos sobre a cantidade de plástico que acabamos tirando, unha vez utilizado, son arrepiantes e extremadamente rechamantes. Unha realidade que está a converter os nosos fondos mariños en auténticos vertedoiros, especialmente de plástico, debido sobre todo á gran resistencia deste tipo de material, que pode perdurar durante séculos no fondo mariño.
