O Trofeo Repsol despregou este sábado velas nas Rías Baixas galegas coa celebración da primeira das dúas xornadas das que sairán os gañadores da 43ª edición da mítica Regata de Primavera do Monte Real Club de Yates de Baiona.
A competición reuniu a 47 veleiros agrupados en clases de cruceiro, competindo baixo a fórmula de compensación de tempos ORC; e monotipos J80 e Fígaros, disputándose as regatas en tempo real.
Foron preto de 300 regatistas representando a clubs náuticos de toda Galicia e a algúns de Portugal, que este sábado disputáronse un percorrido de 28 millas uns e 20 outros, rodeando, con máis ou menos volta, as illas Cíes do Parque Nacional das Illas Atlánticas de Galicia. Aínda que inicialmente o comité de regata tiña previsto un trazado de ida e volta entre Baiona e a ponte de Rande, as condicións de vento non foron as máis indicadas para ese percorrido e a última hora decidiuse realizar o cambio.
A regata disputouse cun vento do noroeste, case de norte, sempre por encima dos 13 nós, o que facilitou a navegación dos veleiros, que puideron completar a proba con axilidade e sen problemas.
CLASE ORC 1-2
Na clase ORC 1-2, a dos barcos máis rápidos, o Magical de Julio Rodríguez (RCN Vigo) colocouse na cabeza desde a saída, liderando á frota en todo momento. Cruzou a liña de chegada o primeiro, tras 3 horas e 57 minutos de travesía, pero a compensación de tempos fíxolle caer á terceira posición, por detrás do Yess Racing de Rui Ramada (MRCYB), que resultou gañador desta primeira proba do Trofeo Repsol; e do Aceites Abril dos irmáns Pérez Canal (RCN Vigo), que trata de revalidar o título da última edición, quedou segundo.
CLASE ORC 3
Na clase ORC 3, unha das máis rifadas do trofeo, o Deep Blue 2.1 de Vicente Cid (RNC Vigo), que a última fin de semana levou os loureiros do Trofeo Comunica, chegou con ganas e forza a esta Regata de Primavera e logrou subirse ao máis alto da táboa. Superou ao Bosch Service Solutions de Ramón Ojea (CM Canido), que quedou segundo; e ao Bom III de Víctor Carrión (CN Punta Lagoa), que chegará á final en terceira posición.
CLASE ORC 4
Os barcos que competiron na clase ORC 4 realizaron un percorrido máis curto que os ORC 1-2-3. Nas 20 millas que o comité de regata marcoulles para circunnavegar as Cíes, o Balea Dous de Luis Pérez (RNC Rodeira) demostrou, unha vez máis, por que é un dos habituais dos podios das competicións das Rías Baixas. Foi o máis rápido da proba e chegará primeiro á final. Séguenlle na clasificación provisional o Nahela de Víctor Álvarez (CN Alagua) e o Albarellos de Fernando Rey (MRCYB).
CLASE ORC A2
Na clase ORC A2, con equipos formados unicamente por dúas persoas, patrón e tripulante, o Q Talento Consultores de Javier Rey, do Monte Real Club de Yates, foi o vencedor; e o Alalunga de Rodrigo Rodríguez, do Club Marítimo de Canido, quedou segundo.
CLASE J80
Na competición dos monotipos J80, a frota máis numerosa da competición, o Okofen de Javier de la Gándara asinou o mellor resultado na etapa inaugural. O veleiro do navegante oceánico, coa súa tripulación habitual, foi o vencedor da última edición e chegou disposto a repetir triunfo. A prata e o bronce provisionais osténtanas o Maija de José Luis Pérez e o Marías de Manel Marías, todos do Monte Real Club de Yates.
CLASE FÍGARO
A clase Fígaro centrou a atención por ser na que máis mulleres navegaron, grazas a participación de catro barcos femininos do proxecto Vela en Feminino do Monte Real Club de Yates, que busca incrementar a presenza de mulleres nas regatas que se celebran en Galicia. Un deles, o Erizana, patroneado por Elena Raga, logrou subirse á terceira posición. O Tutatis de Miguel Montes e o Bouvento de Alejandro Vázquez quedaron primeiro e segundo.
A COSTEIRA DOMINICAL DECIDIRÁ AOS GAÑADORES
O Trofeo Repsol – 43ª Regata de Primavera chega ao seu fin este domingo coa celebración da segunda e última proba, definitiva para configurar a clasificación final. Do mesmo xeito que na primeira xornada, as tripulacións deberán enfrontarse a un percorrido costeiro con saída e chegada en Baiona. Desenvolverase pola ría de Vigo pero os puntos de paso están aínda por decidir, xa que dependerán do vento. Se todo sucede segundo o previsto, o comité de regata dará a saída á frota en torno ao mediodía e pola tarde, ás seis e media, as instalacións do Monte Real Club de Yates acollerán a entrega de premios aos gañadores, na que participarán o presidente do club, José Luis Álvarez; a xefa de mariña e pesca de Repsol, Inés González Megido, en representación da compañía enerxética, patrocinadora do evento; o alcalde de Baiona, Carlos Gómez; e o deputado de Deportes de Pontevedra, Gorka Gómez.
